بۇگىن سولتۇستىك كورەيا ماسەلەسىندە بىرقاتار ماڭىزدى قادامدار جاسالادى

بۇگىن رەسەيدىڭ قيىر-شىعىسىندا (ۆلاديۆوستوك قالاسىندا) ءوتىپ جاتقان ەكونوميكالىق ءسامميتتىڭ ەكىنشى كۇنى. جاپونيانىڭ پرەمەر-ءمينيسترى شينزو ابەنىڭ (Shinzo Abe) بۇگىنگى قىزمەت كۇن ءتارتىبىنىڭ ەڭ ماڭىزدى ءبىر بولىگى - رەسەي پرەزيدەندى ۆلاديمير پۋتينمەن كەزدەسۋ. كەزدەسۋدىڭ باستى تاقىرىبى سولتۇستىك كورەيا ماسەلەسى بولادى دەپ كۇتىلۋدە. بۇل تۋرالى «The New York Times» باسىلىمىنىڭ تاڭعى جاڭالىقتار توپتاماسىندا ايتىلدى.

سارسەنبى كۇنى رەسەي باسشىسى سولتۇستىك كورەيا ماسەلەسى تۋرالى ءوز ويىن ايتقاندا، قازىرگى كەزدە جاسالىپ جاتقان كحدر-عا باعىتتالعان ەكونوميكالىق قىسىمدار مەن اسكەري شارالاردى قاتاڭ ايىپتاعان بولاتىن. بۇل شارالار سولتۇستىك كورەيا ماسەلەسىن شەشۋدەن كورى ودان ارمان ۋشىقتىرىپ جىبەرەتىنىن ايتقان ەدى. ول سوزىندە: «ءبىز بۇل ماسەلەدە ەموتسيامەن شەشىم قابىلداماۋعا  تيىسپىز. بۇل سولتۇستىك كورەيانى تىعىرىققا تىرەيدى جانە الەمدىك ۇلكەن اپاتقا الىپ كەلۋى مۇمكىن»، – دەگەن بولاتىن.

اقش پرەزيدەنتى دونالد ترامپ الەم ەلدەرى باسشىلارىمەن تەلەفوندا سويلەسۋ كەزىندە، سولتۇستىك كورەيامەن كەلىسسوز جاساۋ تۋرالى ۇسىنىستاردى قابىلداماعان. ترامپ مەن قىتاي باسشىسى تەلەفوندا سويلەسۋ كەزىندە، ەكى ەل باسشىسى ورتاق پىكىرگە كەلە الماعانى تۋرالى الەمدىك باسىلىمدار جازدى. ال بۇگىن، اقش-تىڭ سەۋلدەگى «ساد» زىمىران جۇيەسىن سەۋلگە جاقىن جەردە ورنالاستىرۋ ءىسى اياقتالادى دەپ كۇتىلۋدە. وسىنىڭ ءبارى سولتۇستىك كورەيا ماسەلەسىندەگى الەم ەلدەرى مەن باسشىلارى اراسىنداعى ديالوگتاردى جەدەلدەتە تۇسكەنىن كورسەتەدى.

ايتا كەتەيىك، جەر سەرىگىنەن تۇسىرىلگەن سۋرەتتەرگە قاراعاندا سولتۇستىك كورەيانىڭ سوڭعى يادرولىق سىناعىنان تاۋ كوشكىندەرىنىڭ بولعانى انىقتالىپ وتىر.

“The Qazaq Times”