ميانمادان قاشقان روحيندجا مۇسىلماندارى بانگلادەشتە داعدارىس تۋدىردى

ميانما ارمياسىنىڭ قىرعىنىنان قاشقان روحيندجا مۇسىلماندارى بانگلادەشتە ۇلكەن داعدارىس تۋعىزدى. بۇۇ-نىڭ مالىمەتىنە سۇيەنسەك، 5 قىركۇيەكتە 24 ساعات ىشىندە ميانمادان بانگلادەشكە قاشىپ كەلگەن بوسقىندار سانى 35 مىڭنان اسىپ كەتكەن. بۇل تۋرالى BBC-ءدىڭ ونلاين قىزمەتى حابارلاپ وتىر.

بانگلادەشتىڭ پرەمەر-ءمينيسترى الەم باسشىلارىنا جانە بۇۇ-عا مالىمدەمە جولداپ، ميانما ۇكىمەتىنە ون مىڭداعان روحيندجا مۇسىلماندارىن قايتارىپ الۋعا قىسىم ءتۇسىرۋىن تالاپ ەتكەن. سەبەبى ول بانگلادەشتىڭ بىردەن مۇنشالىقتى كوپ بوسقىندارعا پانا بولا المايتىنىن، نەشە ون مىڭداعان ادامعا باسپانا ازىرلەپ بەرە المايتىنىن مالىمدەگەن.

سوڭعى مالىمەتتەرگە قاراعاندا، ازياداعى كوپتەگەن مۇسىلمان ەلدەرى ميانما قارۋلى كۇشتەرىنىڭ ونداعى مۇسىلماندارعا باعىتتاعان قىرعىنشىلىعىنا كۇشتى قارسىلىقتار جاريالاۋدا. بىرىككەن ۇلتتار ۇيىمىنىڭ ميانماداعى وكىلى ياڭحي لي ميانما باسشىسى، نوبەل بەيبىتشىلىك سىيلىعىنىڭ لاۋرەاتى اۋن سان سۋ ءچيدى روحيندجا مۇسىلماندارىن قورعاپ قالماعانى ءۇشىن اۋىر سىنعا العان.

ەستەرىڭىزگە سالا كەتەيىك، ءبىر اپتا بۇرىن روحيندجانىڭ شاعىن توپتارى ونداعى پوليتسيا بولىمشەلەرىنە جاساعان شابۋىلىنان كەيىن، ميانما ارمياسى راكحاين ايماعىندا اسكەري ارەكەتتەردى باستادى. قارۋلى كۇشى ارقىلى جاسالعان زورلىق-زومبىلىقتان شامامەن 73 مىڭ ادام مەكەندەرىن تاستاپ، قونىس اۋدارىپ كەتكەن.

“The Qazaq Times”