رەسەي پرەزيدەنتى قىتايدا. فوتو: ريا نوۆوستي.

رەسەي پرەزيدەنتى ۆلاديمير پۋتين سولتۇستىك كورەياعا قارسى قىسىم جاساۋ شارالارىنا قارسى. رەسەي باسشىسىنىڭ پىكىرىنشە، بۇل شارالار شيەلەنىستى شەشۋدى بىلاي قويىپ، ءىستى ودان ارى ۋشىقتىرىپ جىبەرەدى. بۇل تۋرالى قىتايدىڭ «شينلاڭ» اقپاراتتىق سايتى جازدى.

پۋتين قىتايدا بولىپ وتكەن بريكس ەلدەرى باسشىلارىنىڭ باس قوسۋىنان كەيىن جۋرناليستەردى قابىلداعاندا، سولتۇستىك كورەياعا باعىتتالعان ەكونوميكالىق جانە اسكەري شارالاردى قاتاڭ سىنادى. ءارى بۇل شارالاردىڭ ەش ناتيجە بەرمەيتىنىن ايتىپ ءوتتى.

پۋتين: «ەكونوميكالىق قىسىم جاساۋ ونداعى كوپتەگەن ادامداردىڭ زارداپ شەگۋىمەن عانا اياقتالادى. بۇل سولتۇستىك كورەيا رەجيمىن رايىنان قايتاراتىن بىرەگەي شارا ەمەس. ءتىپتى، سولتۇستىك كورەياعا باعىتتالعان اسكەري شارالار جاھاندىق اپاتقا اپارىپ سوعۋى دا مۇمكىن»، – دەدى. ول جانە سولتۇستىك كورەيا مەن الەم اراسىنداعى بۇل قايشىلىقتىڭ، كەزىندەگى اقش-تىڭ يراكتاعى قادامىنا ۇقساس دەپ باعالادى.

“The Qazaq Times”