بانگلادەشتىڭ بوسقىندار لاگەرىنە كەلگەن روحيندجا مۇسىلماندارىنىڭ سانى ارتتى

ميانماداعى بيلىك وكىلدەرىنىڭ جەرگىلىكتى روحيندجا مۇسىلماندارىنا قارسى ۇيىمداستىرعان گەنوتسيدتەن باس ساۋعالاعان مىڭداعان ازامات بانگلادەش جاعالاۋىنداعى بوسقىندار لاگەرىنە كۇن سايىن تولىسسىز اعىلىپ جاتىر. بۇل تۋرالى ء"ال-جازيرا" اقپاراتتىق اگەنتتىگى جازدى.

بۇۇ-نىڭ بوسقىندار جونىندەگى اگەنتتىگىنىڭ قىزمەتكەرى ۆيۆيان تاننىڭ ايتۋىنشا،  روحيندجا مۇسىلماندارىنا قارسى جاپپاي زورلىق-زومبىلىق اكتىلەرى باستالعان 25 تامىزدان بەرى ون كۇننىڭ ىشىندە  ومىرىن ساقتاپ قالۋ ءۇشىن بانگلادەشتى پانالاعانداردىڭ سانى 73 مىڭعا جەتكەن.

بانگلادەشتىڭ بوسقىندارعا ارنالعان لاگەرلەرى لىق تولى. ۆيۆيان تان ميانمادان ءومىرىن قۇتقارىپ قالۋ ماقساتىندا مۇندا كەلىپ جاتقان مۇسىلمانداردىڭ جاعدايلارى اۋىر ەكەنىن ايتادى. "ولاردىڭ كوبى بىرنەشە كۇن قاتارىنان اس ىشپەگەن. جارالانعاندار مەن شۇعىل مەديتسينالىق كومەكتى قاجەت ەتەتىن ادامدار كوپ", - دەيدى ول.

ميانمانىڭ بيلىك وكىلدەرى "اراكاندى قۇتقارۋ ارمياسى" اتانعان روحيندجا مۇسىلماندارى جەرگىلىكتى بۋدديستەرگە قارسى كۇش قولدانۋ ارەكەتىن ءبىرىنشى باستاعانىن العا تارتىپ وتىرعانىمەن، جاپپاي قىرىپ-جويۋدان شەكارا اسىپ، قاشىپ قۇتىلعان بوسقىندار بيرما باسشىلىعىنىڭ نەگىزگى ماقساتى - مۇسىلمانداردى ەلدەن قۋ ەكەنىن جەتكىزدى.

ەستەرىڭىزگە سالا كەتەيىك، وسى جىلدىڭ تامىز ايىندا ميانماداعى اراكان ايماعىن مەكەندەيتىن روحيندجا مۇسىلماندارىنىڭ اۋىلدارىن ورتەپ، ادامدارىن جاپپاي قىرىپ-جويۋ ارەكەتتەرى بولعان بولاتىن. قازىر دە جالعاسىپ جاتقان اياۋسىز گەنوتسيدكە قارسى بۇۇ ءالى ەشقانداي شارا قولدانباي وتىر. ءارتۇرلى باسىلىمداردىڭ حابارلاۋىنشا، قۇربان بولعان بەيبىت تۇرعىنداردىڭ سانى 400-گە جۋىقتاعان. ميانماعا ەشقانداي قۇقىق قورعاۋ ۇيىمدارى مەن جۋرناليستەردى كىرگىزبەي وتىرعاندىقتان، ناقتى رەسمي دەرەكتەر جوق. 2012 جىلى ءدال وسىنداي مۇسىلماندارعا قارسى زورلىق-زومبىلىق وقيعاسى بولعان كەزدە، 43 روحيندجالىق كوز جۇمعان ەدى.

“The Qazaq Times”