ميرزيەەۆ: بۇگىن ءوز اسكەرىنە قولداۋ كورسەتپەگەن ەل، ەرتەڭ وزگە ەلدىڭ اسكەرىنە قولداۋ كورسەتەتىن بولادى

وزبەكستان پرەزيدەنتى شاۆكات ميرزيەەۆ وزبەك اسكەرىنىڭ ماتەريالدى-تەحنيكالىق بازاسىن جاقسارتۋ مەن اسكەري ءبىلىم بەرۋ سالاسىن دامىتۋ كەرەگىن ايتتى.

سامارقاند قالاسىندا وتكەن اسكەري ۆيەوسەلەكتورلىق كەڭەستە شاۆكات ميرزيەەۆ: «ءبىز جوعارى ءبىلىمدى، جان-جاقتى دامىعان اسكەري قىزمەتكەرلەردى دايىنداۋعا ءتيىستىمىز. وسىعان بايلانىستى الداعى ۋاقىتتا رەسپۋبليكا بويىنشا 29 اسكەري ليتسەي اشىلاتىن بولادى. بۇل ليتسەيلار بۇرىنعى ليتسەيلەردەن مۇلدە وزگەشە بولۋى كەرەك. سەبەبى بۇل ليتسەيلەردى جوعارى ءبىلىمدى، فيزيكالىق تۇرعىدان مىقتى،ينتەللەكتۋالدى دامىعان ساربازدار ءبىتىرىپ شىعۋى ءتيىس. ويتكەنى بۇگىن ءوز اسكەرىنە قولداۋ كورسەتپەگەن ەل، ەرتەڭ وزگە ەلدىڭ اسكەرىنە قولداۋ كورسەتەتىن بولادى» - دەگەن.

بۇدان بولەك شاۆكات ميرزيەەۆ وزبەكستان اسكەرىندەگى جوعارى شەندى ازاماتتارعا وتان قورعاۋشىلار كۇنىن مەملەكەتتىك دەڭگەيدە، جالپى حالىقتىق مەرەكە رەتىندە اتاپ ءوتۋ كەرەكتىگىن ايتىپ، وسىعان بايلانىستى ءتيىستى تاپسىرمالار بەرگەن.

“The Qazaq Times”