سولتۇستىك كورەيا زىمىراندارى اقش پەن وڭتۇستىك كورەيانىڭ ءىرى اسكەري بازالارىنا جەتەدى

وسىدان ەكى كۇن بۇرىن، سولتۇستىك كورەيانىڭ كەڭىستىككە شىعارعان ءۇش بىردەي زىمىران سىناعى تۋرالى وڭتۇستىك كورەيا ۇكىمەتى مەن باق العاش بولىپ حابارلاعان ەدى. كەزەكتى زىمىران سىناعىنداعى قىسقا قاشىقتاعى زىمىراندارى اقش-تىڭ وڭتۇستىك كورەياداعى اسكەري بازالارىنا جەتە الادى. بۇل - كحدر-نىڭ الدىنعى ايدان بەرى العاشقى قىسقا قاشىقتاعى راكەتا سىناعى. «The New York Times» باسىلىمىنىڭ حابارىندا، اقش تىنىق مۇحيت قولباسشىلىق شتابى بۇل ءۇش زىمىراننىڭ بىرەۋى جەردەن كوتەرىلە بەرە جارىلىپ كەتكەن دە، ال وزگە ەكەۋى 250 شاقىرىم قاشىقتىققا دەيىن ۇشىپ بارىپ، تەڭىزگە قۇلاعان.

پيوڭياڭ (پحەنيان) تارابىنىڭ زىمىران سىناعىن قالپىنا كەلتىرۋى، قۇراما شتاتتار مەن وڭتۇستىك كورەياعا قارۋ سىناقتارىن جانە باسقا دا ارانداتۋشىلىقتى توقتاتۋعا بەرگەن ەسكەرتۋى دەۋگە دە بولادى. ءوڭىر قاۋىپسىزدىگىنەن الىپ قارار بولساق، سولتۇستىك كورەيانىڭ زىمىران سىناعى الەمگە قانشالىقتى جەككورىنىشتى بولسا، اقش پەن وڭتۇستىك كورەيانىڭ ونداعى اسكەري وقۋ-جاتتىعۋى دا ءوڭىر تىنىشتىعىنا سونشالىقتى كەرەعار ءىس. ياعني، وڭىرلىك داۋدىڭ ۋشىعۋى استە ءبىر جاقتى مەنمەندىكتەن ەمەس.

سەنبى كۇنى ۇشىرىلعان زىمىرانداردىڭ اقش پەن وڭتۇستىك كورەيانى الاڭداتاتىن سەبەبى – بۇل زىمىرانداردىڭ ۇشىپ جەتكەن ارالىعى، اقش پەن وڭتۇستىك كورەيانىڭ بىرلەسكەن ءىرى اسكەري بازالارىنا ۇشىپ بارۋعا جەتكىلىكتى قاشىقتىق. وڭتۇستىك كورەياداعى اقش-پەن بىرلەسكەن اسكەري بازا بولسا سەۋل قالاسىنان وڭتۇستىككە 100 شاقىرىم اينالاسىنداعى جەرگە ورنالاسقان. «سولتۇستىك كورەيا سان رەت زىمىران سىناعانىمەن كوپ تۇتىكتى راكەتالارىن ۇشىرۋى، ولاردىڭ بۇل سالادا ءبىرشاما العا باسقان جەتىستىكتەرىن كورسەتەدى». - دەپ قارايدى «نيۋ-يورك تايمس» باسىلىمى. سونىمەن، امەريكا قۇراما شتاتتارى «ساد» دەپ اتالاتىن الدىڭعى قاتارلى زىمىراندىق قورعانىس جۇيەسىن ورناتۋعا كىرىستى.

قازىر وڭتۇستىك كورەيا قاۋىپسىزدىك سالالارى ءۇش زىمىراندى جان-جاقتى تەكسەرۋدى باستاپ كەتتى. سولتۇستىك كورەيا وسىدان بۇرىن دا 300مم كاليبرلى كوپ تۇتىكتى زىمىراندارىن سىناعان بولاتىن. سونىمەن قوسا سەگىز تۇتىكتى زىمىراندارىن كورسەتكەن كەزدەرى دە بار. وسىنىڭ ءبارى وڭتۇستىك كورەيا ۇكىمەتىن الاڭداتىپ وتىر.

تەك زىمىراندار عانا ەمەس، سولتۇستىك كورەيا ەكى كورەيا شەكاراسىنا ۇزاق قاشىقتىققا اتىلاتىن ارتيللەريالارىن دا ورنالاستىرىپ قويعان. زىمىراندارىن بىلاي قويعاندا، ارتيللەريالارىنىڭ ءوزى وڭتۇستىك كورەيا ورتالىق قالاسىن اتقىلاۋعا قابىلەتتى. وسىنىڭ ءوزى وڭتۇستىك كورەيانىڭ كوپتەگەن قالالارىن ءورت تەڭىزىنە اينالدىرا الادى. ديامەترى 240 مم بولاتىن ەسكى زىمىراننىڭ جويعىش قۋاتىنىڭ ءوزى ديامەترى 60 شاقىرىم اۋماقتى قۇرايدى. بۇل 10 ملن حالىق تۇراتىن سەۋل قالاسىنىڭ اۋماعىمەن قارايلاس.

سولتۇستىك كورەيانىڭ بۇل جەتىستىكتەرىنىڭ ءوزى اقش پەن وڭتۇستىك كورەيانى الاڭداتۋعا جەتكىلىكتى. ەكى وداقتاس بىرلەسە وتكىزگەن اسكەري وقۋ-جاتتىعۋلار سولتۇستىك كورەياعا قىر كورسەتىپ، ساباسىنا ءتۇسىرۋ ماقساتىندا بولدى. بىراق، ونىڭ ناتيجەسى ءىستى ودان ارمان ۋشىقتىرماسا جەڭىلدەتكەن جوق. سولتۇستىك كورەيا ەرەگەسە تۇرىپ، زىمىران ۇشىردى. مىنە بۇل قازىرگى كورەي تۇبەگىنىڭ قولدان جاسالىپ وتىرعان قايشىلىعى.

“The Qazaq Times”