فوتو: nash-yaroslavl.ru

Apple كومپانياسىنىڭ  iPhone 8 دەگەن اتاۋعا يە بولاتىن سمارتفونىنىڭ تانىستىرىلىمى 12 قىركۇيەكتە وتەدى. ال ساتىلىم 22 قىركۇيەكتە باستالۋى مۇمكىن. مۇنداي مالىمەتتى Mac4Ever باسىلىمى كومپانيادا تاراعان اقپاراتتارعا سۇيەنىپ، تاراتىپ وتىر.

سوڭعى ۋاقىتتا ۇيالى وپەراتورلار مەن جەتكىزۋشىلەردەن باستاپ ءتۇرلى دەرەككوزدەردە تاراعان اقپاراتتارعا سۇيەنسەك، گادەجتتىڭ قانداي بولاتىنىن ەلەستەتۋگە بولادى.

iPhone 8  OLED-ەكرانىنىڭ كولەمى 5,8 ديۋيم بولاتىن ەڭ ۇلكەن سمارتفون بولماق.  IPhone 7 Plus-ءتىڭ ەكرانى 5,5 ديۋيم بولعان. ساراپشىلاردىڭ سوزىنشە، سمارتفوننىڭ ەكرانى بارلىق بەتىن الىپ جاتادى، ياعني شەتتەرىندە ەشبىر قىر بولمايدى. جاڭا ءونىمنىڭ ارتىقشىلىعى - Home باتىرماسى بولماۋى. ونىڭ قىزمەتىن "ۆيرتۋالدى" باتىرما اتقاراتىن بولادى.

سونداي-اق، جاڭا تەلەفوندا ساۋساق ءىزى ارقىلى قۇرىلعىنىڭ يەسىن انىقتايتىن Touch ID تەحنولوگياسىنىڭ ورنىنا، قولدالانۋشىلاردى انىقتاۋ ءۇشىن تۇلعانى تانۋ تەحنولوگياسى پايدالانىلادى.

iPhone 8-ءدىڭ تاعى ءبىر ەرەكشەلىگى جادىندا بولۋى مۇمكىن. ويتكەنى قىتايلىق Geekbar باسىلىمىنىڭ مالىمەتىنشە، جاڭا مودەلدىڭ جادى 64 گب-تان باستالىپ، 512 گب-پەن اياقتالادى. 512 گب Apple سمارتفوندارى ءۇشىن ەڭ كوپ جاد. ال باسقا باسىلىمدار "تەلەفوننىڭ جادى تەك 128 جانە 256 گب-تى قۇرايدى" دەگەندى ايتادى.

سونداي-اق، دەرەككوزدەرگە سۇيەنسەك، سمارتفون سىمسىز قۋاتتاعىشپەن جابدىقتالعان.  دەگەنمەن جاڭا ونىمنەن اسا ايىرماشىلىق كۇتۋدىڭ قاجەتى جوق. ادەتتەگىدەي، جۇمىس جىلدامدىعى جاقسارىپ، كامەرا مەن باتارەياسىنىڭ سيپاتىنا قاتىستى وزگەرىستەر عانا بولۋى مۇمكىن.

ال باعاسىنا كەلەتىن بولساق، جاڭا تەحنولوگيانىڭ باعاسى 1000-1100 دوللار شاماسىندا بولادى دەپ بولجانعان.

“The Qazaq Times”