يەمەن بيلىگى يراندى ەلدە سوعىس وتىن تۇتاندىرىپ وتىر دەپ ايىپتادى

يەمەن بيلىگى يراندى ەلدە ازامات سوعىسىنىڭ وتىن تۇتاندىرىپ وتىر دەپ ايىپتادى.

يەمەن سىرتقى ىستەر ءمينيسترى ابدۋلمالىك ءال-مەحلافي جۋرناليستەر الدىندا سويلەگەن سوزىندە: «يران حۋتي قوزعالىسىنداعى شيت بۇلىكشىلەرىن قولداۋ ارقىلى يەمەندە ازامات سوعىسىنىڭ وتىن تۇتاندىرىپ وتىر. يەمەن يرانسىز-اق ءوزىنىڭ ىشكى ماسەلەلەرىن شەشە الادى» - دەگەن.

بۇعان دەيىن ساۋد ارابياسىنىڭ بىرىككەن ۇلتتار ۇيىمىنداعى ەلشىسى ابداللاح ءال-مۋاليموم تەھراندى (تەگەراندى) «يەمەن اۋماعىنداعى حۋتي قوزعالىسىن قارۋ-جاراقپەن قامتاماسىز ەتىپ وتىر» دەپ ايىپتاعان بولاتىن. يران ءوز كەزەگىندە ساۋد ارابياسى مەن يەمەن تاراپىنان جاسالعان بۇل ايىپتاۋلاردى نەگىزسىز دەپ، ءوزىنىڭ حۋتي قوزعالىسىنا ەشقانداي قاتىسى جوق ەكەندىگىن ايتقان ەدى.

ەستەرىڭىزگە سالايىق، يەمەندە ەل بيلىگى مەن حۋتي شيت بۇلىكشىلەرى اراسىنداعى سوعىس 2014 جىلدىڭ قىركۇيەك ايىنان بەرى جالعاسىپ كەلەدى.

“The Qazaq Times”