اقش رەسەيلىكتەرگە ۆيزا بەرۋدى توقتاتادى

23 تامىزدان باستاپ اقش رەسەيگە ۆيزا بەرۋدى توقتاتادى. بۇل تۋرالى رەسەيدەگى اقش ەلشىلىگىنىڭ مالىمدەمەسىنە سىلتەمە جاساپ ريا نوۆوستي حابارلادى.

"رەسەي فەدەراتسياسىنىڭ اقش-تىڭ ديپلوماتيالىق قىزمەتكەرلەرىنىڭ سانىنا شەكتەۋ قويۋ تۋرالى قابىلداعان شەشىمىنە بايلانىستى 2017 جىلدىڭ 23 تامىزىنان باستاپ رەسەي بويىنشا يمميگراتسيالىق ەمەس ۆيزا بەرۋ توقتاتىلادى", - دەپ حابارلاعان ەلشىلىك.

ال بۇل ماسەلە قىركۇيەك ايىندا تەك ماسكەۋدە عانا قايتا قالپىنا كەلەدى.

"2017 جىلدىڭ 1 قىركۇيەگىنەن باستاپ بۇل پروتسەدۋرا قايتا قالپىنا كەلەدى. رەسەيدەگى اقش-تىڭ كونسۋلدىعىندا يمميگراتسيالىق ەمەس ۆيزانى بەرۋ بەلگىلى ءبىر ۋاقىتقا توقتاتىلادى", - دەلىنگەن ەلشىلىك حابارلاماسىندا.

ەلشىلىكتىڭ مالىمەتىنشە، ۆيزا الۋ بويىنشا بۇعان دەيىن تاعايىندالعان اڭگىمەلەسۋلەر كەرى شەگەرىلەدى، ال اقش ۆيزاسىن راسىمدەۋگە قۇجاتتارىن تاپسىرعاندارعا اڭگىمەلەسۋگە قاتىستى وزگەرىستەر حابارلانىپ وتىرادى.

ايتا كەتەيىك، وسى جىلدىڭ شىلدە ايىندا رەسەي پرەزيدەنتى ۆلاديمير پۋتين رەسەيدە تۇراتىن اقش ديپلوماتيالىق قىزمەتكەرلەرىن قىسقارتاتىنىن راستاعان. اقش رەسەيگە باعىتتالعان جاڭا سانكتسيانى بەكىتكەننەن كەيىن، وعان قارسى جاۋاپ رەتىندە رەسەي ەل ىشىندەگى اقش ديپلوماتيالىق قىزمەتكەرلەرىن قىسقارتۋدى ءجون دەپ تاپقان.

“The Qazaq Times”