يرانداعى جانە سۇرياداعى زىمىران وندىرەتىن ورىنداردىڭ سۋرەتتەرى. فوتو: Ewoow.

يزرايل مەملەكەتتىك كانالىنىڭ حابارلاۋىنا قاراعاندا، يران ءسۇريانىڭ جەرورتا تەڭىزى جاعالاۋىندا زىمىران وندىرەتىن فابريكا سالعان. يزرايل جاق جەرسەرىكتەردەن تۇسىرىلگەن سۋرەتتەرگە تالداۋ جاساي كەلە، جەرورتا تەڭىزى جاعالاۋىنداعى ورنالاسقان بانياس اۋدانىنداعى فابريكا قۇرىلىسىن "زىمىران وندىرۋگە ارنالعان" دەپ تۇجىرىمداعان. بۇل تۋرالى "تۇرىك تەلە-راديو" قىزمەتىنىڭ رەسمي سايتى جازدى.

عارىشتان تۇسىرىلگەن سۋرەتتەرگە تالداۋ قورىتىندىسى بۇل جەردەگى قۇرىلىستاردىڭ يران ورتالىق قالاسى تەھران (تەگەران) ماڭىنداعى زىمىران ءوندىرۋشى فابريكانىڭ قۇرىلىس جوباسىمەن بۇتىندەي ۇقساس ەكەنىن العا تارتادى. وسىعان قاراي وتىرىپ، يزرايل ۇكىمەتى يراندى ء"سۇريادا زىمىران ءوندىرىپ وتىر" دەپ قارايدى.

يزرايل جاق يراننىڭ ءسۇريا جەرىندەگى ىقپالىنىڭ ارتىپ كەتۋىنە ءتىس-تىرناعىمەن قارسى. يزرايلدىڭ ۇكىمەت باسشىسى «يراننىڭ ءسۇريادا اسىرەسە ەلدىڭ وڭتۇستىگىندە اسكەري ارەكەت جاساۋىنا مۇلدە جول بەرمەۋ كەرەك» دەگەن ءسوزى بار. ولار ءسۇريا مەن يزرايل شەكاراسىندا يران جانە ونى قولداۋشى كۇشتەردىڭ بەل الىپ كەتۋىنەن قاۋىپتەنەدى. سول ءۇشىن يراننىڭ سۇرياداعى بارلىق قادامىن قالت جىبەرمەي باقىلاۋمەن كەلەدى.

“The Qazaq Times”