Ирандағы және Сүриядағы зымыран өндіретін орындардың суреттері. Фото: Ewoow.

Израиль мемлекеттік каналының хабарлауына қарағанда, Иран Сүрияның Жерорта теңізі жағалауында зымыран өндіретін фабрика салған. Израиль жақ жерсеріктерден түсірілген суреттерге талдау жасай келе, Жерорта теңізі жағалауындағы орналасқан Баняс ауданындағы фабрика құрылысын "зымыран өндіруге арналған" деп тұжырымдаған. Бұл туралы "Түрік Теле-Радио" қызметінің ресми сайты жазды.

Ғарыштан түсірілген суреттерге талдау қорытындысы бұл жердегі құрылыстардың Иран орталық қаласы Теһран (Тегеран) маңындағы зымыран өндіруші фабриканың құрылыс жобасымен бүтіндей ұқсас екенін алға тартады. Осыған қарай отырып, Израиль үкіметі Иранды "Сүрияда зымыран өндіріп отыр" деп қарайды.

Израиль жақ Иранның Сүрия жеріндегі ықпалының артып кетуіне тіс-тырнағымен қарсы. Израильдың үкімет басшысы «Иранның Сүрияда әсіресе елдің оңтүстігінде әскери әрекет жасауына мүлде жол бермеу керек» деген сөзі бар. Олар Сүрия мен Израиль шекарасында Иран және оны қолдаушы күштердің бел алып кетуінен қауіптенеді. Сол үшін Иранның Сүриядағы барлық қадамын қалт жібермей бақылаумен келеді.

“The Qazaq Times”