يران لاۋازىمدىسى: يراندا يزرايلگە قارسى سوعىس جوسپارى جوق

يران ءماجىلىسى ۇلتتىق قاۋىپسىزدىك جانە سىرتقى ساياسات كوميتەتىنىڭ توراعاسى حاشمەتۋللاح فەلاحەتپيشە مالىمدەمە جاساپ، يراننىڭ يزرايلگە قارسى قانداي دا ءبىر سوعىس جوسپارىنىڭ جوق ەكەنىن ايتتى.

ورتا-تاياۋ شىعىستاعى يران مەن يزرايل اراسىندا ۇزاق ۋاقىتتان بەرى قايشىلىقتى جاعدايدىڭ بار ەكەنى بەلگىلى. بۇعان دەيىن يراننىڭ رۋحاني كوسەمدەرى مەن ۇكىمەت باسشىلارىنىڭ سوزىنەن «پالەستينانى ازات ەتۋ ارمانى»، «سيونيزمدى تۇبىرىمەن جوعالتۋ» سەكىلدى ۇراندار كوبىرەك قايتالانعان. يراننىڭ ءسۇريا جەرىندەگى قادامدارى وڭىردە يران-يزرايل اراسىندا سوعىس بولۋى مۇمكىن دەگەن قاۋىپتى كۇشەيتكەن بولاتىن.

حاشمەتۋللاح فەلاحەتپيش يراننىڭ سىرتىق ساياساتى تۋرالى جاساعان مالىمدەمەسىندە: «يران-يزرايل اراسىندا سوڭعى كەزدەرى ۋشىققان قارىم-قاتىناسقا قاراماستان تەھراننىڭ (تەگەران) يزرايلگە قارسى سوعىس جوسپارى جوق»، – دەدى.

الايدا، جاقىندا عانا ەلدىڭ ءسىم باسشىسى مۇحاممەد جەۆات زاريف حالىقارالىق كونفەرەنتسيادا جاساعان مالىمدەمەسىندە «يراننىڭ يزرايلگە سوعىس اشۋى مۇمكىن» دەگەن سىڭايدا پىكىر بىلدىرگەن. فەلاحەتپيش ونى تەرىسكە شىعارىپ: «يراندا تەل-اۆيۆكە قارسى سوعىس جوسپارى جوق»، – دەپ مالىمدەدى. ءارى، ءسىم باسشىسىنىڭ سوزىندە ارتىق كەتكەنىن ايتقان.

“The Qazaq Times”