وڭتۇستىك كورەيا پرەزيدەنتى كورەي تۇبەگىندە سوعىس بولمايتىنىن كەسىپ ايتتى

وڭتۇستىك كورەيا پرەزيدەنتى ءمۇن جا-ءيننىڭ (Moon Jae-in) تاققا وتىرعانىنا 100 كۇن تولدى. وڭتۇستىك كورەيانىڭ ورتالىق تەلەارناسى SBS-نىڭ حابارلاۋىنا قاراعاندا، ءمۇن جا-ين پرەزيدەنت عيماراتىندا جۋرناليستەردى قابىلداعان. كورەي تۇبەگىنىڭ الداعى تاعدىرىنا الاڭداعان جۋرناليستەردىڭ كوڭىلىن وڭتۇستىك كورەيا پرەزيدەنتى: «كورەي تۇبەگىندەگى جاعداي ەشقاشان سوعىسقا ۇلاسپايدى»، – دەگەن كەسىمدى جاۋابىمەن ورنىقتىرعان.

پرەزيدەنت ءمۇن جا-ين سوزىندە: «وڭتۇستىك كورەيانىڭ ءبىر نيەت، ءبىر تىلەكتە كۇش جۇمىلدىرۋ ۇستانىمى، كورەي تۇبەگى داعدارىسىنىڭ سوعىسقا ۇلاسپاۋىنىڭ نەگىزگى كەپىلى. ءبىز سوعىس تۋدىرماۋعا تىرىسامىز. ەگەر تاعى ءبىر مارتە سوعىس تۋاتىن بولسا بارلىعى كۇلگە اينالادى. كورەي تۇبەگىنىڭ اسكەري ءىس-قيمىلىنا تەك وڭتۇستىك كورەيا شەشىم قابىلداي الادى. ەگەر وڭتۇستىك كورەيا كەلىسپەسە، باسقا ەشبىر تاراپ كورەي تۇبەگىندە سوعىس باستامايدى»، – دەدى.

ايماقتاعى ەلدەر عانا ەمەس، الەم ەلدەرى دە كورەي تۇبەگىندە تۋى مۇمكىن يادرولىق سوعىسقا الاڭداپ كەلگەن. دەگەنمەن، قازىرگى ءار تاراپتىڭ قادامدارى بۇل قاۋىپتىڭ اۋىلىن ءبىرشاما الىستاتتى. وڭتۇستىك كورەيا پرەزيدەنتىنىڭ بۇل ءسوزى تۇبەكتەگى حالىقتاردىڭ كوڭىلىنە مەدەۋ بولسا كەرەك. ول حالىقتىڭ الاڭسىز، تىنىش تىرشىلىك ەتۋىنە بولاتىنىن ايتتى. ءارى وزدەرىنىڭ كورەيلەردىڭ تاعدىرىنا قاۋىپ تۋدىراتىن بۇل قادامعا بارمايتىنىن اتاپ ءوتتى.

“The Qazaq Times”