فوتو: APF/Getty Images

فيلليپين پوليتسياسى جۇرگىزگەن تۇنگى رەيد شاراسى كەزىندە 32 ادام ءولتىرىلدى. قۇقىق قورعاۋ قىزمەتكەرلەرىنىڭ حابارلاۋىنشا، قازا تاپقاندار ەسىرتكىگە قاتىسى بار دەگەن كۇدىكتىلەر. وقيعا ورنىندا قولدارىنا قارۋ الىپ، پوليتسياعا قارسىلىق كورسەتكەندەرى ءۇشىن جان تاپسىرعان. بۇل تۋرالى BBC اقپاراتتىق اگەنتتىگى جازدى. 

24 ساعات بويى جۇرگىزىلگەن رەيد ەل استاناسى مانيلادان سولتۇستىككە قاراي ورنالاسقان بۋلاكان پروۆينتسياسىندا بولعان. اتالعان شارا مەملەكەت باسشىسى رودريگو دۋتەرتەنىڭ ءفيلليپيندى ناشاقورلىقتان تۇگەل تازارتۋ ماقساتىندا قولعا العان ساياساتىنىڭ اياسىندا جۇزەگە اسىپ وتىر. 2016 جىلدان بەرى مىڭداعان كۇدىكتى سوتقا جەتپەي، كىناسى دالەلدەنبەستەن، ۇستالعان جەردە ولتىرىلگەن. بۇل ارەكەتى ءۇشىن الەم ەلدەرى باسشىلارى مەن قۇقىق قورعاۋ ۇيىمدارىنىڭ نارازىلىعىنا ۇشىراعان پرەزيدەنت قولعا العان ءىسىن جالعاستىرىپ كەلەدى.

رەيد كەزىندە 100-گە جۋىق ادام اباقتىعا جابىلىپ، زاڭسىز اينالىمداعى ەسىرتكى مەن قارۋ-جاراق تاركىلەندى.

سوتسىز ءولتىرۋ ءىسىن ايىپتاۋشىلار كوپ بولعانىمەن، جەرگىلىكتى حالىق رودريگو دۋتەرتە ساياساتىن قولدايتىنى بايقالادى. بەيبىت تۇرعىندار قالا كوشەلەرىندە ءجۇرۋ قاۋىپسىز بولا باستاعانىن ايتادى. سوڭعى كەزدەرى پوليتسيا پايدا تابۋ ماقساتىندا، جازىقسىز ادامداردى ولتىرەدى دەگەن مالىمدەمەلەر سانى ارتا باستاعان سوڭ، اعىمداعى جىلدىڭ قاڭتار ايىندا پرەزيدەنت ناشاقورلىققا قارسى كۇرەس باسقارماسىن تاراتىپ، قايتا قۇردى. جاڭا قىزمەتكەرلەر جۇمىسىن ناۋرىز ايىنان باستاپ قايتا جۇرگىزىپ كەلەدى.

“The Qazaq Times”