سولتۇستىك كورەيا بالليستيكالىق زىمىراندارى. فوتو: The Wall Street Journal.

سەيسەنبى كۇنى اقش بارلاۋ ۇيىمىنىڭ وكىلى ۋاشينگتون جاق سولتۇستىك كورەيا زىمىران قوزعالتقىشتاردى وزدەرى وندىرەتىنىن، ونىڭ يمپورتتالماعانىن راستايتىنىن ايتتى. سوڭعى كەزدەرى كەيبىر ساراپشىلار كيم جوڭ ۋن (كيم چەن ىن/ Kim Jong Un) ۇكىمەتى زىمىران قوزعالتقىشتاردى ۋكراينا، رەسەي نەمەسە بۇرىنعى كەڭەس وداعىنان بولىنگەن ەلدەردەن يمپورت ەتكەن بولۋى مۇمكىن دەپ كۇماندانعان بولاتىن. بۇل تۋرالى «The Wall Street Journal» باسىلىمى حابارلايدى.

حالىقارالىق ستراتەگيالىق زەرتتەۋلەر ينستيتۋتى (International Institute for Strategic Studies) دۇيسەنبى كۇنى جاريالاعان مالىمەتىندە، سولتۇستىك كورەيانىڭ سوڭعى زىمىران سىناقتارىنا پايدالانىلعان قوزعالتقىش كەڭەس وداعىندا جوبالانعان راكەتالىق قوزعالتقىشتارعا ۇقسايتىنىن ايتقان بولاتىن. ال، سولتۇستىك كورەيا زاڭسىز جولدار ارقىلى رەسەي نەمەسە ۋكراينا ەلدەرىنەن زىمىران قوزعالتقىشتارىن جەتكىزگەن بولۋى مۇمكىن دەگەن قورىتىندى شىعارعان ەدى.

سەيسەنبى كۇنى اقش بارلاۋ ۇيىمدارى بۇعان قارسى ءۋاج ايتتى. ولاردىڭ تەكسەرىپ انىقتاۋىنشا، سولتۇستىك كورەيا زىمىران قوزعالتقىشتاردى يمپورتتاماعان. كەرىسىنشە، اقش سولتۇستىك كورەيانىڭ ءوزى دەربەس زىمىران قوزعالتقىشىن جاساپ شىعارۋ مۇمكىندىگى بار دەپ قارايدى. بارلاۋ ۇيىمدارىنىڭ وكىلدەرى بۇدان ارى مالىمەت بەرمەگەن. الايدا، ولار اقش بارلاۋ ۇيىمدارى ۇزاق ۋاقىتتان بەرى سولتۇستىك كورەيا زىمىران باعدارلامالارىن باقىلاپ كەلە جاتقانىن العا تارتۋدا.

اقش ورتالىق بارلاۋ باسقارماسىنىڭ باستىعى مايك پومپەو، جەكسەنبى كۇنى CBS ارناسىنىڭ «ۇلتتىڭ تۇلعاسى» اتتى باعدارلاماسىندا سويلەگەن سوزىندە، بارلاۋ ۇيىمىنىڭ كيم جوڭ ۋندى جانە ونىڭ دامىتۋعا تولىقتاي سەرپىن بەرىپ وتىرعان بالليستيكالىق زىمىران باعدارلامالارىن تولىقتاي باقىلاپ وتىرعانىن ايتقان بولاتىن. ول سوزىندە: «بۇل قىزمەتتە بارلاۋ ۇيىمى شىنىندا تابىستى ەڭبەك ەتتى»، – دەدى.

“The Qazaq Times”