اقش وداقتاستارىنىڭ سەنىمىنە يە بولۋ ءۇشىن كورەي تۇبەگىنە اسكەر باسشىسىن جىبەردى

اقش-كورەيا اراسىندا ەسكەرتۋلەر مەن ۇركىتۋلەر الماسىپ جاتقان تۇستا، اقش اسكەري شتاب-پاتەر باسشىسى جوزەف دانفوردتىڭ كورەي تۇبەگىنە بارا جاتقانى ءمالىم بولدى. ول كورەي تۇبەگىنە باراتىن ساپاردان بۇرىن جۋرناليستەرگە «اسكەري باسىمدىلىق ۇكىمەتتىڭ ديپلوماتيالىق جانە ەكونوميكالىق تالپىنىستاردى قولداۋ ءۇشىن. ال ۇكىمەتتىڭ تالپىنىستارى ءساتسىز بولاتىن بولسا، اسكەري كۇش ءار كەزدە دە دايىن بولۋى كەرەك» دەگەن. بۇل تۋرالى اقش باسىلىمدارىنا سىلتەمە جاساي وتىرىپ، «تۇرىك تەلە-راديو» قىزمەتىنىڭ سايتى حابارلادى.

جوزەف دانفورد ساپارىنىڭ ماقساتىن وڭتۇستىك كورەيا، جاپونيا قاتارلى وداقتاستاردىڭ سەنىمىن ارتتىرۋمەن بىرگە قىتاي مەن ەكى ورتاداعى تۇسىنبەستىكتەردىڭ الدىن الۋ، اسكەري سەلبەستىكتى جۇزەگە اسىرۋ دەپ ءتۇسىندىردى. ول كورەي تۇبەگى ماسەلەسىنەن سوعىسسىز شىعۋدى قالايتىندارىن، الايدا سولتۇستىك كورەيانىڭ اقش پەن سول ايماقتاعى وداقتاستارىن يادرولىق قارۋمەن قورقىتۋىن مۇلدە قابىلداي المايتىندارىن جەتكىزدى.

امەريكالىق ساراپشىلار سولتۇستىك كورەيانىڭ اقش-تى يادرولىق قارۋمەن اتقىلاۋعا تالپىناتىندىعىن، الايدا يادرولىق سوعىس قاۋپى ءالى دە الىستا ەكەنىن ايتۋدا. قىتاي تارابى سولتۇستىك كورەياعا ەكونوميكالىق قىسىمىن باستاپ كەتتى. وڭىردەگى قايشىلىقتىڭ سوعىسسىز شەشىم تابۋى ەڭ الدىمەن اقش-سولتۇستىك كورەيا اراسىنداعى بىتىمگەرشىلىكتە تۇرعانى انىق. الايدا، يادرولىق مەنمەندىك ەكى ەلدى دە كەلىسسوز ۇستەلىنە جاقىنداتپاي وتىر.

“The Qazaq Times”