كيم جوڭ ۋن جانە كحدر اسكەريلەرى. فوتو:网易新闻.

كورەي تۇبەگىندەگى شيەلەنىس شىرماۋىندا. اقش پەن سولتۇستىك كورەيا اراسىنداعى قاراما-قاراسى جاسالىپ جاتقان ەسكەرتۋ، قورقىتۋ، ۇرەيلەندىرۋ سوزدەرى، وزگە ەلدەردىڭ اقپارات قۇرالدارى جاعىنان «اۋىزشا سوعىس» دەپ باعالانا باستادى. يادرولىق مەنمەندىك پەن دەرجاۆالىق پاڭدىق كورەي تۇبەگى مەن سولتۇستىك شىعىس ازيانى ۇرەي استىندا قالتىراتىپ وتىر.

اقش پرەزيدەنتى ترامپ كحدر-عا قاراتقان ءبىر سوزىندە «ۋاشينگتون سولتۇستىك كورەياعا شابۋىل جاساۋعا وقتالىپ، قولى شۇرىپپەدە تۇر» دەگەن ەدى. بۇل زىلدەي سوزگە سولتۇستىك كورەيا گۋام ارالىنا زىمىران شابۋىلى جوسپارىن جاساپ جاتقانىمەن جاۋاپتاستى. ءبىر تاراپتان قانداي دا ءبىر ەسكەرتۋ ايتىلسا، ەكىنشى جاق قارىمتاسىن قايتارىپ وتىر.

كحدر ورتالىق اقپارات اگەنتتىگى جانە ەلدەگى بىرنەشە رەسمي باسىلىمعا سىلتەمە جاساي وتىرىپ «شينلاڭ» اقپاراتتىق سايتىنىڭ حابارلاۋىنا قاراعاندا، قازىر سولتۇستىك كورەياداعى 3,5 ملن اسكەري جاتتىعۋدان وتكەن ەرىكتى اقش-پەن قان مايداندا كەزىگۋگە دايىن ەكەنىن جاريالاپ، شەرۋ جاساعان.

كورەي تۇبەگى جاعدايىنا بايلانىستى ايماقتاعى ەلدەر ءارتۇرلى شارالار قولدانۋدا. قىتاي وسىدان بۇرىن ءوزىنىڭ قۋاتتى زىمىراندارىن اسكەري شەرۋگە الىپ شىعىپ، الەمدى تىكسىندىرگەن ەدى. وڭتۇستىك كورەيا بولسا قىتاي قارسىلىعىنا قاراماستان «ساد» زىمىرانعا قارسى جۇيەسىن ورنالاستىرۋعا شەشىم قابىلدادى. اقش ءوزىنىڭ اۋە جانە زىمىران قورعانىس تەحنيكالارى مەن يادرولىق ارسەنالىن جاڭارتۋدا. وعان قوسا، اقش سۋ استى سوعىس كەمەلەرى دە كورەي تۇبەگىنە جاقىن اۋماقتاردا بۇيرىق كۇتىپ ءجۇر دەگەن اقپارات بار. ال، رەسەي بولسا ءوزىنىڭ قيىر-شىعىستاعى اۋە جانە زىمىران قورعانىس جۇيەلەرىن دايىندىق كۇيگە وتكىزگەنىن حابارلادى.

كورەي تۇبەگى شيەلەنىسىنىڭ كەلىپ شىعۋىن ءار جاقتىڭ ساراپشىلارى ءار ءتۇرلى ايتادى. دەگەنمەن، ءتۇرلى پىكىرلەردىڭ اراسىنان ورتاقتىق ىزدەر بولساق، اقش-تىڭ ازياعا ءوز ىقپالىن كۇشەيتۋ ءۇشىن، ەكىنشى دۇنيە سوعىسىنان بەرى قاراي، جەڭىلگەن جاپونيا مەن بولىنگەن كورەيانى شىرماپ ۇستاپ، ازيا تىنىق مۇحيت ەلدەرى اراسىندا ءوز مەيماناسىن تاسىتۋدى كوزدەگەن سىڭار جاقتى ساياساتىنىڭ جەمىسى دەپ قارالادى.

“The Qazaq Times”