فوتو: ۆۆس.

يران زىمىران قۇراستىرۋعا بولىنەتىن قارجى كولەمىن ۇلعايتاتىن بولدى، دەپ حابارلايدى ۆۆس اقپارات اگەنتتىگى.

تەھران (تەگەران) پارلامەنتى زىمىران قۇراستىرۋ مەن شەتەلدە وتكىزەتىن اسكەري وپەراتسيالارعا بولىنەتىن قارجىنى ۇلعايتۋعا بايلانىستى زاڭدى ماقۇلدادى. بۇل زاڭ جوباسى اقش-تىڭ يرانعا سالعان جاڭا سانكتسيالارىنا جاۋاپ رەتىندە قابىلدانعان.

زاڭ جوباسى  بويىنشا، يراننىڭ جىل بويى بالليستيكالىق زىمىرانداردى قۇراستىرۋ مەن ەلدەن تىسقارىدا اسكەري وپەراتسيالار وتكىزۋىنە 260 ميلليون دوللار كولەمىندە قارجى ءبولۋ قاراستىرىلعان. زاڭدى تەھران پارلامەنتىنىڭ 240 دەپۋتاتى ماقۇلداپ، 4 دەپۋتاتى قالىس قالعان.

قابىلدانعان زاڭ جوباسىنا بايلانىستى پارلامەنت سپيكەرى ءالي لاريدجاني: «بۇل زاڭ يران بيلىگىنىڭ تەرروريزم مەن اقش تاراپىنان جاسالاتىن ءتۇرلى سانكتسيالىق شەشىمدەرگە قارسى جاساپ وتىرعان قادامدارىنىڭ ءبىرى» - دەگەن.

“The Qazaq Times”