فوتو: NewsNetwork

سوڭعى ون جىلدا قازاقستاننان جىلىستاعان تىكەلەي ينۆەستيتسيانىڭ جالپى كولەمى  58,3 ملرد دوللاردى قۇرادى. قاراجاتتىڭ ەڭ كوپ بولىگى 2010 جىلى كەتكەن - شامامەن 10,5 ملرد دوللار، ال ەڭ از 3 ملرد دوللار قاراجات 2012 جىلى جىلىستاعان. 2016 جىلى قازاقستاننان كەتكەن قارجى كولەمى 4,4 ملرد دوللاردى قۇرادى جانە بۇل 2015 جىلمەن سالىستىرعاندا  36,7 پايىزعا تومەن ($6,9 ملرد). 

ال بۇل تسيفرلار:

  • قازاقستان ازاماتتارىنىڭ شەتەلدەگى جىلجىمايتىن مۇلىكتىڭ جانە شەتەلدىك كاسىپورىنداردىڭ ۇلەسىنىڭ كەم دەگەندە 10 پايىزىن ساتىپ الۋعا جۇمسالعان قارجىسى ەكەنىن;
  • شەتەلدىك كومپانيالارداعى شىعىنى نەمەسە تابىسى;
  • جانە ينۆەستيتسيا ەكەنىن بىلدىرەدى.

Forbes باسىلىمى ۇسىنعان مالىمەتتەر

 

سونىمەن كوپشىلىگىنىڭ قارجى يەلەرىنىڭ ناقتى كىم ەكەنىن، جيناعىنىڭ قانشا ەكەنىن قۇپيا ساقتاعىسى كەلۋى جانە سالىقتان جالتارۋى ەلدەگى كاپيتالدىڭ جىلىستاۋىنا اكەپ سوعۋدا. Forbes Kazakhstan باسىلىمىنىڭ مالىمەتىنشە، بۇل قارجىلاردىڭ 79,6%-ى وفشورلى ايماقتارى بار مەملەكەتتەرگە جىبەرىلگەن.

باسىلىمنىڭ جازۋىنشا، قر قارجى مينيسترلىگى جىل سايىن "سالىق جەڭىلدىكتەرى بار مەملەكەتتەردىڭ" ءتىزىمىن جاريالايدى. سوڭعى جاريالانىم بويىنشا تىزىمدە 58 ەل بار. ولاردىڭ سانى 2015 جىلى يندونەزيا، ليۋكسەمبۋرگ جانە بىرىككەن اراب امىرلىگى تىزىمنەن شىققان سوڭ قىسقارعان. ال 2016 جىلى كيپر تىزىمنەن "كەتتى".

Forbes باسىلىمى ۇسىنعان مالىمەتتەر

سونىمەن مالىمەتتەرگە سەنسەك، الدىڭعى قاتارلى 15 ەلگە  جىلىستاعان ينۆەستيتسيا كولەمى 2016 جىلى ەلگە كەلگەن جالپى كاپيتالدىڭ 98,4%-ىن قۇرايدى. ولاردىڭ ىشىندە سەگىزى وفشورلى ايماق نەمەسە تەرريتورياسىندا سونداي ورىندار بار مەملەكەتتەر.

تىكەلەي ينۆەستيتسيالاردىڭ ەڭ كوپ مولشەرى، ياعني 2,8 ملرد دوللارى نيدەرلاندىدا تىركەلگەن. بۇل جالپى سومانىڭ 64,9 پايىزىن قۇرايدى. 2015 جىلعا قاراعاندا بۇل سان 46,5 پايىزعا تومەن ەكەن.

ال كورشى رەسەي ەلىنە 667 ملن دوللار "كەتكەن". بۇل كورسەتكىش 2015 جىلمەن سالىستىرعاندا 70,2 پايىزعا جوعارى بولىپ وتىر.

بىرىككەن اراب امىرلىگىنە، كايمان ارالدارىنا  جانە ۇلىبريتانياعا قازاقستاندىقتار تيىسىنشە $ 313,2 ملن، $ 71,6 ملن جانە $ 66,5 ملن اۋدارعان.

ال تۇركياعا اۋدارىلعان قارجى كولەمى ايتارلىقتاي ۇلعايعان. 2015 جىلى كورسەتكىش $10,5 ملن بولسا، 2016 جىلى 5,8 ەسەگە ءوسىپ، $61 ميلليوندى قۇراعان. اقش ەلىندەگى قارجى بىردەن $208,9 ميلليوننان $17,8 ميلليونعا دەيىن تومەندەگەن.

Forbes باسىلىمىنىڭ مالىمەتىنشە، ينۆەستيتسيانىڭ كوپ بولىگى، شامامەن $2,4 ملرد باس كومپانيالاردىڭ جانە باسقارۋ ماسەلەلەلەرى بويىنشا كەڭەس بەرۋ قىزمەتىنە جۇمسالعان.

ال جەكە تۇتىنۋشىلىق قىزمەتىنە، قىزمەتشىلەر جالداۋعا، ءۇي شارۋاشىلىعى قىزمەتىنە $609,2 ملن جۇمسالعان جانە بۇل 2015 جىلعا قاراعاندا 2,4 ەسەگە جوعارى.

ايتا كەتەيىك، وسى جىلدىڭ باسىندا قازاقستاننىڭ سالىق كودەكسىنە كەز كەلگەن مۇلىك پەن تابىستى مىندەتتى تۇردە دەكلاراتسيالاۋ نورماسى ەنگىزىلگەن. قارجى مينيسترلىگىنىڭ مالىمەتىنشە، 2015 جىلى قازاقستاندىقتار 700 ملن دوللارعا جۋىق شەتەلدىك تابىستارىن دەكلاراتسيالاعان. الايدا وفشورعا "كەتكەن" ميلللياردتاعان دوللاردىڭ جانىندا بۇل قارجى كولگە تامعان تامشىداي عانا.

“The Qazaq Times”