ماي پەنس ترامپتىڭ تاعىنا تالاسپايتىنىن ايتتى

بريتاندىق رەيتەر اگەنتتىگىنىڭ حابارىندا 6 تامىز كۇنى اقش ۆيتسە-پرەزيدەنتى مايك پەنس ءوزىنىڭ 2020 جىلى اقش پرەزيدەنت سايلاۋىنا قاتىسقالى جاتقانىن جوققا شىعاردى. ءارى بۇل تۋرالى تاراعان اقپاراتتى "دورەكى داقپىرت" دەپ ايىپتادى.

وسىدان بۇرىن «The New York Times» باسىلىمى كەيبىر رەسپۋبليكاشىلدار پارتياسىنىڭ وكىلدەرى «كولەڭكە اكتسياسى كومانداسىن» جاساقتاپ، قازىرگى پرەزيدەنت دونالد ترامپتى دا شارپىعان ساياسي توپ بولىپ وتىر دەپ حابارلاعان ەدى. سونىمەن بىرگە، ەگەر پرەزيدەنت ترامپ كەلەسى پرەزيدەنت سايلاۋىنا قاتىسپايتىن بولسا، مايك پەنستى جاقتاۋشىلار ونىڭ پارتيا ىشىندەگى ىقپالىن ارتتىرا وتىرىپ، پرەزيدەنت سايلاۋىنا قاتىسادى دەپ بولجانعان بولاتىن.

اتالعان باسىلىمدا جاسالعان بولجامدار اراسىندا مايك پەنستە تولىقتاي جاسالعان ساياسي كۇنتىزبەنىڭ ءالى دە جوق ەكەنىن، ول ءوزى ءۇشىن «ۇلى امەريكالىق كوميتەت» دەپ اتالاتىن، ءىرى قارجىلىق قورلاردى قامتىعان قۋاتتى توپ قالىپتاستىرۋ ۇستىندە  دەگەن ايتىلىمدار دا بار ەدى.

الايدا، اقش ۆيتسە-پرەزيدەنتى بۇل اقپاراتتىڭ ءبارىن جوققا شىعارىپ «دورەكى جالعان اقپارات» دەپ باعالادى. ول ءوزىنىڭ بۇكىل كومانداسىنىڭ پرەزيدەنت ترامپتىڭ ساياساتىن جۇزەگە اسىرۋعا باعىتتالعانىن اتاپ ءوتتى. سونىمەن بىرگە ول كومانداسىمەن بىرگە پرەزيدەنت ترامپتى 2020 جىلعى سايلاۋعا قايتالاي قاتىستىرۋ جۇمىستارىن اتقارىپ جاتقاندارىن ايتىپ ءوتتى. ول سوزىندە: «بۇل ماقالادا ايتىلعانداردىڭ ءبارى دە بۇتىندەي ويدان قۇراستىرىلعان. ول كۇندەلىكتى كەزدەسىپ تۇراتىن ساياسي داقپىرت تۋدىرۋ ءۇشىن بىرەۋلەردىڭ ىستەپ وتىرعانى» دەدى.

الايدا، «The New York Times» باسىلىمى وزدەرىنىڭ بولجامدارىنىڭ شىندىققا جاراساتىنىن قايتالاي ايتىپ ءوتتى.

سول كۇنى اقۇيدىڭ اعا كەڭەسشىسى بۇل ماسەلەگە ارنايى جاۋاپ بەرىپ، مايك پەنستىڭ كەلەسى پرەزيدەنت سايلاۋعا قاتىساتىنىن جوققا شىعاردى. ول جانە ABC ارناسىنىڭ «This Week» باعدارلاماسىنىڭ سۇحباتىن قابىلداعان كەزدە دە، مايك پەنستىڭ 2020 جىلعى سايلاۋعا قازىرگى پرەزيدەنت ءۇشىن دايىندىق جۇمىستارىن جاساپ جاتقانىن العا تارتتى. ول ون جىلدان بەرى قىزمەتتەس بولعان مايك پەنستى وتە ادال، ىسكەر، سەنىمدى ۆيتسە-پرەزيدەنت دەپ باعالادى.

“The Qazaq Times”