ءبىر ساعات جۇگىرۋ ءومىردى جەتى ساعاتقا ۇزارتادى

جاتتىعۋ جانە مەزگىلسىز ءولىمدى زەرتتەۋ ينستيتۋتىنىڭ زەرتتەۋ ساراپتاماسىنا قاراعاندا، ءومىر ءسۇرۋدى بارىنشا ۇزارتۋ ءۇشىن جۇگىرۋ ەڭ ءتيىمدى جاتتىعۋ سانالادى ەكەن. جاڭا زەرتتەۋ ناتيجەلەرى كورسەتكەندەي، جۇگىرۋ داعدىسى جوق ادامعا قاراعاندا، ۇنەمى جۇگىرىپ ارەكەت جاسايتىن ادام كەمىندە ءۇش جىل ارتىق ءومىر سۇرەدى ەكەن. زەرتتەۋشىلەر باسقادا ارەكەتتەردى سالىستىرا زەرتەي كەلە ءتۇرلى سپورتتىق جاتتىعۋلار اراسىندا جۇگىرۋدىڭ ادام ءومىرىن ۇزارتۋعا، سالاۋاتتى ءومىر ۇستانۋعا بارىنشا ءتيىمدى ەكەنىن زەرتتەپ انىقتاعان. بۇل تۋرالى «The New York Times» باسىلىمى جازعان بولاتىن.

بۇل زەرتتەۋ قورتىندىسىن ءۇش جىل بۇرىن قۇرىلعان زەررتەۋشىلەر توبى داللاس كۋپەر ينستيتۋتىنىڭ مەديتسينالىق جانە دەنە فيتنەس سىناق مالىمەتتەرىن ءجىتى قاراپ زەرتتەۋ ارقىلى قولعا كەلتىرگەن. ناتيجەسىندە، ءتىپتى ءسىز ءار كۇنى بەس مينۋي ۋاقىتتى جۇگىرۋگە ارناساڭىز دا ءسىزدىڭ ۇزاق ءومىر سۇرۋىڭىزگە اسەر ەتەدى دەگەن قورىتىندىعا كەلەدى.

زەرتتەۋشىلەر وزدەرىنە كەلىپ تۇسكەن سۇراۋلارعا جاۋاپ بەرۋگە تىرىستى. باسىم كوپ ادامدار وزگە سپورتتىق جاتتىعۋلار ۇزاق سالاۋاتتى ءومىر سۇرۋدە جۇگىرۋمەن بىردەي ىقپال ەتە مە دەگەن ساۋالداردى قويعان. ال، ۇزاققا جۇگىرۋشى سپورتشىلار نەمەسە اۋەسكەرلەر جاتتىعۋ بارىسىندا نەمەسە ءوزى ماقسات ەتكەن نىساناعا جۇگىرىپ جەتكەننەن كەيىندە سانالارىندا: وسى مەنىڭ قۇلشىنىسىم شىنىمەن مەنىڭ ۇزاق ءارى سالاۋاتتى ءومىر سۇرۋىمە پايداسى بار ما، الدە قۇر ارام تەر بولىپ ءجۇرمىن بە دەپ ويلايتىندارىن دا جاسىرماعان. ەندى ءبىر توپ ادامدار، جۇگىرىپ تۇرۋ قانشالىقتى پايدالى؟ مەزگىلسىز ولىمنەن ساقتانۋ ءۇشىن ازاپتى جۇگىرىستەردىڭ ءسىرا قانشالىقتى پايداسى بار؟ ءبىر جىل ارتىق ءومىر ءسۇرۋ ءۇشىن مۇنشالىق ازاپتى جاتتىعۋلار بەرگەن بوداۋدى وتەي الا ما دەپ تە كۇمانداناتىندارىن جەتكىزدى.

زەرتتەۋشىلەر جەكەلەگەن ادامداردان كەلگەن وسى سۇراقتارعا جاۋاپ تابۋ ءۇشىن قۇلشىنىس جاسادى. كۋپەر ينستيتۋتىندا جيناقتالعان دەرەكتەردى سارالادى. سونداي-اق، باسقا دا سوڭعى اۋقىمدى زەرتتەۋ ناتيجەلەرىن تالداپ قوزعالىس مەن ءولىم اراسىنداعى كوررەلياتسيالىق بايلانىستى تابۋعا تىرىستى. اقىرى عالىمدار مىناداي قورىتىندى جاسادى: قيمىل-ارەكەتتىڭ تەز-اقىرىندىعىنا، ۇزاق-قىسقالىعىنا قاراماستان، جۇگىرۋ مەزگىلسىز ءولىم قاۋپىن 40 پايزعا ازايتادى. الايدا، بۇل كورسەتكىشكە تەمەكى شەگۋ، الكوگول تۇتىنۋ جانە جوعارى قان قىسىمى، سەمىزدىك قاتارلى ادەتتەر مەن اۋرۋ تاريحى بار ادامدار كىرمەيدى.

عالىمدار وسى جانە وزگەدە جۇگىرۋ ادەتى جوق ادامدار بىردەن جۇگىرۋدى ادەتكە اينالدىرار بولسا، مەرزىمسىز ءولىم مولشەرى 16 % مولشەرىندە تومەندەيدى، ءارى ولىمگە سەبەپشى بولاتىن اۋىرۋلارعا جۇعىمدالۋ سالىستىرماسى 25 پايىزعا ازايادى دەپ وتىر. كۋپەر ينستيتۋتىنداعى زەرتتەۋ نىسانى بولعان ادامدارعا قويىلعان تالاپ بويىنشا ءبىر اپتادا ەكى ساعات ۋاقىتتى جۇگىرۋگە ارنايدى. زرەتتەۋ ناتيجەسى كورسەتكەندەي، مۇنداي داعدىداعى ادام 40 جاس جاسادى دەسەك، جۇگىرۋگە بولگەن ۋاقىتى 6 ايدان اسپايدى. الايدا، ول ءومىرى 3,2 جىلعا ۇزارادى. تازا قۇنى 2,8 جىل دەپ كورسەتەدى. وسىعان قاراپ عالىمدار 1 ساعات جۇگىرۋ، عۇمىردى 7 ساعاتقا ۇزارتادى دەپ ەسەپتەگەن.

“The Qazaq Times”