فوتو: tut.by

وسىدان بىرنەشە ونجىلدىق بۇرىن ءوز جەرىندە كەزەكتى وليمپيادا ويىندارىن قابىلداعان مونرەال قالاسىنداعى سپورتتىق ستاديوننىڭ ەسىگى بوسقىندار ءۇشىن قايتا اشىلدى. 1976 جىلى مۇندا جىزعى وليمپيادا ويىندارى وتكەن بولاتىن. بۇل تۋرالى Euronews اقپاراتتىق اگەنتتىگى جازدى.

سىيىمدىلىعى 66 مىڭ ادامدى قامتيتىن ستاديونعا كەلىپ جەتكەن بوسقىنداردىڭ العاشقى 100-ىنە توسەك ورىندارى مەن ازىق-تۇلىك بەرىلدى. گۋمانيتارلىق كومەك ۇيىمداستىرۋشىلار ستاديون باسشىلىعىنان تاعى 600 توسەك ورنىن سۇراپ، ءوتىنىش ءبىلدىردى. دەگەنمەن، ستاديون بوسقىنداردى ورنالاستىرۋ ءۇشىن ۋاقىتشا عانا پايدالانىلادى.

ايتا كەتەيىك، اقش-تا دونالد ترامپتىڭ ساياساتىنا وراي، 6 مۇسىلمان مەملەكەتىنىڭ ازاماتتارىنا امەريكاعا كىرۋگە تىيىم سالىنىپ، ەلدەگى ءبىراز بوسقىندى دەپورتاتسيالاۋ تۋرالى ماسەلە كوتەرىلگەن ەدى. اقش-تىڭ سالقىن قاباق تانىتۋىنان سەزىكتەنگەن كوپ بوسقىن شەكارا اسىپ، كاناداعا جەتتى.

كانادانىڭ پرەمەر-ءمينيسترى دجاستين تريۋدو بوسقىنداردى قابىلداۋعا بايلانىستى ەركىن ساياسات ۇستانىپ وتىر. اسىرەسە، سيرياداعى سوعىستان قاشقان حالىققا باسپانا مەن قاۋىپسىزدىك بەرۋ ءبىرىنشى كەزەكتە ورىندالىپ جاتىر. وعان دالەل -وتكەن جىلدىڭ شىلدە ايىندا كۆەبەك پروۆينتسياسىندا  180 بوسقىن بولسا، بيىل وسى ۋاقىت ارالىعىندا وڭىرگە قونىس اۋدارعان بوسقىنداردىڭ سانى 1174-كە جەتكەن.

“The Qazaq Times”