فوتو: bbc.com

اقش پرەزيدەنتى دونالد ترامپ امەريكا مەن رەسەيدىڭ قارىم قاتىناسى "قاۋىپتى شەكتە" تۇرعانىن جەتكىزدى. وسى اپتانىڭ سارسەنبىسىندە ول جاڭا سانكتسيالار تۋرالى زاڭنىڭ قابىلدانۋىنا قارسىلىق ءبىلدىرىپ، ونى قاتەلىك دەپ اتاعانىنا قاراماستان، رەسەي، يران جانە  سولتۇستىك كورەياعا قارسى ەكونوميكالىق شەكتەۋ شارالارىن جۇرگىزۋ تۋرالى قۇجاتقا قول قويىپ ەدى. بۇل تۋرالى BBC اقپاراتتىق اگەنتتىگى جازادى.

اتالعان زاڭ جوباسى رەسەيدىڭ 2014 جىلى ۋكرايناداعى قىرىم ماسەلەسىنە قاتىستى ارەكەتى ءۇشىن سالىنعان سانكتسيالاردى قاتاڭداتىپ، امەريكادا وسى جىلى وتكەن پرەزيدەنتتىك سايلاۋعا ارالاستى دەگەن ءالى دالەلدەنبەگەن ايىبى ءۇشىن جاڭا شەكتەۋ شارالارىن ەنگىزەدى. ماسكەۋدە بۇل قۇجاتتى رەسەيگە قارسى باستالعان "ساۋدا سوعىسى" دەپ قابىلدادى.

ءوزىنىڭ تۆيتتەر پاراقشاسىندا، بولعان وقيعاعا نارازىلىعىن بىلدىرگەن پرەزيدەنت دونالد ترامپ: ء"بىزدىڭ رەسەيمەن قارىم-قاتىناسىمىز "قاۋىپتى شەكتە" تۇر. وسىنىڭ بارىنە سەندەرگە ءتىپتى، دۇرىس دەنساۋلىق ساقتاۋ رەفورماسىن ۇسىنا الماي وتىرعان كونگرەسس كىنالى. مەن پرەزيدەنت ەسەبىندە، سىرتقى ساياساتتا وزگە مەملەكەتتەرمەن، كونگرەسسكە قاراعاندا جاقسىراق مامىلەگە كەلەمىن" ، - دەپ جازدى.

وعان جاۋاپ رەتىندە رەسپۋبليكالىق سەناتور توم كوتتون باق وكىلدەرىنە بەرگەن سۇحباتىندا: ء"بىزدىڭ رەسەيمەن قارىم-قاتىناسىمىزدىڭ "قاۋىپتى شەكتە" تۇرعانىنا ۆلاديمير پۋتين كىنالى", - دەدى.

وسىدان بۇرىن جاڭا سانكتسيالارعا قاتىستى "بۇل - رەسەي مەن اقش-تىڭ قارىم-قاتىناسى جاقسارۋى مۇمكىن دەگەن كەز-كەلگەن ءۇمىتتى ءبىرجولا جويادى" دەپ پىكىر بىلدىرگەن دميتري مەدۆەدەۆ ءوزىنىڭ Facebook پاراقشاسىندا بىلاي دەپ جازدى: "قولعا الىنعان شارالار دونالد ترامپتىڭ تولىقتاي السىزدىگىن كورسەتتى، كونگرەسس ونى قورلادى".

كرەملدىڭ ءباسپاسوز حاتشىسى دميتري پەسكوۆ بەرىلگەن پىكىر تۋرالى جاۋابىن "رەسەي ءوزىنىڭ مۇددەلەرىن قورعايتىن بولادى", - دەپ، قىسقا قايىردى.

“The Qazaq Times”