اقش ۆيتسە پرەزيدەنتى مايك پەنس. فوتو: The Wall Street Journal.

اقش ۆيتسە-پرەزيدەنتى مايك پەنس سولتۇستىك كورەيا يادرولىق باعدارلاماسىن اۋىزدىقتاۋ ءۇشىن ەلدىڭ ەڭ جوعارى باسشىسى كيم جوڭ ۋنمەن (Kim Jong Un) تىكەلەي ديالوگ وتكىزۋ يدەياسىن قابىلدامادى. ول اقش ءبىرىنشى كەزەكتە ەكونوميكالىق جانە ديپلوماتيالىق قىسىم كورسەتۋگە ۇمتىلادى دەدى. بۇل تۋرالى «The Wall Street Journal» باسىلىمى حابارلايدى.

مايك پەنستىڭ ايتۋىنشا، اقش سولتۇستىك كورەيامەن تىكەلەي كەلىسسوزگە كەلمەيدى. يادرولىق باعدارلاماسىن تىزگىندەۋ ءۇشىن ەڭ الدىعى شارا قىسىمدى ارتتىرۋ دەپ قارايدى. وعان قوسىمشا قىتايدىڭ رولىندە كوبىرەك پايدالانباق. اقش ۆيتسە-پرەزيدەنتى سوزىندە: «اقش اسكەري كۇش قولدانۋ مۇمكىندىگىن جوققا شىعارمايدى. ءبىز بارلىق پارامەترلەردى قاراستىرىپ وتىرمىز»، – دەدى.

مايك پەنس ەستونيا، گرۋزيا جانە چەرنوگوريا ەلدەرىنە اقش اۋە كۇشتەرىنىڭ ۇشاعىمەن ساپارلاپ قايتقاندا وسىنداي شەشىم جاساسا كەرەك. ترامپ تا سولتۇستىك كورەيانى ەكونوميكالىق جانە ديپلوماتيالىق وقشاۋلاۋدى ايتىپ كەلەدى. الايدا، ترامپ ەڭ ءبىرىنشى قىتاي ارقىلى كحدر بيلىگىن كەلىسىمگە شاقىرۋدى ناسيحاتتايدى. ترامپ ۇكىمەتى ءۇشىن سانكتسيا سالۋ ەڭ باستى قۇرال. الايدا ونىڭ جاعدايدى دۇرىس جاققا بۇرۋعا كەرى اسەرى كوبىرەك تيگەلى تۇر.

“The Qazaq Times”