فوتو: Nur.kz

ۇلتتىق بانكتىڭ مالىمەتىنشە، دوللار كۋرسىنىڭ بىردەن قىمباتتاپ كەتۋى اقش بيلىگىنىڭ رەسەيگە سالعان سانكتسياسىنىڭ جاعىمسىز اسەرىمەن بايلانىستى.

"تەڭگە كۋرسىنىڭ جاعدايى اقش-تىڭ رەسەيگە سالعان سانكتسياسىنىڭ جاعىمسىز اسەرىمەن بايلانىستى جانە سانكتسيا ماسەلەسى ودان ارى قالاي بولاتىنى بەلگىسىز، سونداي-اق رەسەي ءرۋبلىنىڭ ديناميكاسىمەن دە بايلانىستى. ال باق-تاعى سپەكۋلياتيۆتى تۇسىنىكتەمەلەر اقش دوللارىنا دەگەن سۇرانىستى شامادان تىس ارتتىرىپ وتىر", - دەيدى قر ۇلتتىق بانكىنىڭ مونەتارلى وپەراتسيالار جونىندەگى دەپارتامەنتىنىڭ ديرەكتورى ءاليا مولدابەكوۆا.

سونداي-اق، باس بانكتىڭ وكىلى بۇدان بولەك مۇنداي كۋرستىڭ قالىپتاسۋىنا بىرقاتار فاكتورلار اسەر ەتىپ وتىرعانىن ايتادى.

"ەلدەگى ۆاليۋتا كۋرسى - ءىرى ساۋدا سەرىكتەستەرى، تولەم بالانسى، ينفلياتسيا، قرۇب بازالىق مولشەرلەمەسى، الەمدىك پايىزدىق مولشەرلەمەلەر جانە باسقالار. الايدا قىسقا مەرزىمدە تەڭگە كۋرسىنا جانە قۇبىلمالىقتىڭ كوبەيۋىنە نارىققا قاتىسۋشىلاردىڭ بولجامىنىڭ كۇرت وزگەرۋى سىندى بىرنەشە فاكتور اسەر ەتەدى", - دەيدى ءاليا مولدابەكوۆا.

بۇدان بولەك ول قازاقستاندىقتارعا دوللار ساتىپ الۋدىڭ قاجەتى جوق ەكەنىن ايتتى.

"ايىرباس باعامىنىڭ قالىپتاسۋى ۆاليۋتا نارىعىنداعى سۇرانىس پەن ۇسىنىستىڭ نەگىزىندە، نارىقتىق شارتتارمەن كوممەرتسيالىق بانكتەردىڭ قاتىسۋىمەن بولادى. ايىرباستاۋ باعامىنىڭ وزگەرۋى قىسقا مەرزىمدى فاكتورلاردىڭ كومبيناتسياسىمەن بايلانىستى. ياعني بۇل ديناميكا الىپساتارلىق فاكتورلارعا نەگىزدەلگەنىن ەسكەرە وتىرىپ، ۇلتتىق بانك حالىقتىڭ شەتەل ۆاليۋتاسىن ساتىپ الۋىنا ەش نەگىز جوق دەپ ەسەپتەيدى", - دەدى ۇلتتىق بانك وكىلى.

ايتا كەتەيىك، بۇگىن قازاقستان قور بيرجاسىندا وتكەن تاڭعى ساۋدا سەسسياسىندا دوللار كۋرسى بىردەن 5,8 تەڭگەگە قىمباتتاپ، ورتاشا باعام 334,53 تەڭگەنى قۇرادى. ال 1 تامىز كۇنى كۇندىزگى سەسسيادا كۋرس 330,43 تەڭگە بولعان. ايىرباستاۋ پۋنتەرىندە دوللاردى ساتۋ 340 تەڭگەگە دەيىن كوتەرىلدى.

“The Qazaq Times”