قر سىرتقى ىستەر مينيسترلىگى عيماراتى. فوتو: Tengrinews.kz.

قازاقستان سىرتقى ىستەر مينيسترلىگى ارناۋلى مالىمدەمە جاساپ، سولتۇستىك كورەيانىڭ 28 شىلدەدەگى بالليستيكالىق زىمىران سىناعىن ايىپتادى. بۇل تۋرالى قازاقستان ءسىم رەسمي سايتىندا جازىلدى.

سىرتقى ىستەر مينيسترلىگىنىڭ مالىمدەمەسىندە: «قازاقستان رەسپۋبليكاسى 2017 جىلدىڭ 28 شىلدەسىندەگى كورەي حالىقتىق دەموكراتيالىق رەسپۋبليكاسىنىڭ بالليستيكالىق زىمىراندى ۇشىرۋىن ءۇزىلدى-كەسىلدى باتىل ايىپتايدى. مۇنداي ءىس ارەكەتتەر بۇۇ قاۋىپسىزدىك كەڭەسىنىڭ قارارلارىن ورەسكەل بۇزۋشىلىق بولىپ تابىلادى، بەيبىتشىلىككە قاۋىپ توندىرەدى. سونىمەن بىرگە، شىعىس ازيا وڭىرلىك جانە جاھاندىق اۋقىمداعى جاعدايدى ۋشىقتىرادى»، – دەپ جازىلعان.

وعان قوسا مالىمدەمەدە كحدر-نىڭ جاۋاپسىز يادرولىق باعدارلامانى دامىتۋ ساياساتى الەمدىك يادروسىزدانۋ پروتسەسىنە كەرى اسەر ەتەدى دەپ ايىپتاعان. ءارى، كحدر جانە الەم حالقىنىڭ قاۋىپسىزدىگىن ەسكەرە وتىرىپ، يادرولىق مەنمەندىكتەن باتىل تۇردە باس تارتۋعا شاقىرعان. قالىپتاسقان شيەلەنىستى سولتۇستىك كورەيا ۇكىمەتى بەلسەندى تۇردە كۇشپەن ەمەس، كەلىسسوزدەرمەن شەشۋگە تىرىسۋى كەرەك دەپ سانايدى قر سىرتقى ىستەر مينيسترلىگى.

“The Qazaq Times”