فوتو: YouTube

ۋكراينا پرەزيدەنتى پەتر پوروشەنكو گرۋزيانىڭ بۇرىنعى باسشىسى، ودەسسا وبلىسىنىڭ ەكس-گۋبەرناتورى ميحايل سااكاشۆيليدى ۋكراينا ازاماتتىعىنان شىعارىپ تاستاۋعا بايلانىستى جارلىق شىعاردى دەپ جازادى ۋكراينا مەملەكەتتىك كوشى-قون قىزمەتىنىڭ سايتى.

پەتر پوروشەنكونىڭ ءوزىنىڭ رەسمي سايتىندا سااكاشۆيليدى ۋكراينا ازاماتتىعىنان شىعارىپ تاستاۋ جايىندا ەشقانداي ماتەريال جاريالانباعان.

ميحايل سااكاشۆيلي ودەسسا وبلىسىنىڭ گۋبەرناتورى قىزمەتىنەن 2016 جىلدىڭ كۇزىندە پوروشەنكونىڭ قاتاڭ سىنىنان كەيىن كەتكەن بولاتىن. قازىرگى تاڭدا گرۋزيادا ونىڭ ۇستىنەن قىلمىستىق ءىس قوزعالعان.

بۇل جايىندا شىلدەنىڭ 26 كۇنى ۋكراينا پارلامەنتىنىڭ دەپۋتاتى يگور موسيچۋك: «ءيا بۇل راس. سااكاشۆيلي ۋكراينا ازاماتتىعىنان شىعارىپ تاستالدى. پەتر پوروشەنكو وسى قادامى ارقىلى ءوز قاتەلىكتەرىن مويىنداي باستاعان سياقتى» - دەدى.

پەتر پوروشەنكو ميحايل سااكاشۆيليگە ۋكراينا ازاماتتىعىن 2015 جىلدىڭ 30 مامىر كۇنى بەرىپ، سول كۇنى ودەسسا وبلىسىنىڭ گۋبەرناتورى قىزمەتىنە تاعايىنداعان ەدى. گۋبەرناتور بولىپ تاعايىندالا سالعان كۇننەن باستاپ، سااكاشۆيلي جەرگىلىكتى ەليتامەن قاقتىعىسا باستاعان بولاتىن. ول ءتىپتى پەتر پوروشەنكو ماڭىندا جۇرگەندەردىڭ بارلىعان جەمقورلار دەپ ايىپتاعان ەدى.

2016 جىلدىڭ 7 قاراشا كۇنى ميحايل سااكاشۆيل ءوزىنىڭ وتستاۆكاعا كەتۋىن: «ودەسسا وبلىسى كيەۆتەگى جەمقورلار ورىندارىنان كەتكەن كۇنى عانا داميتىن بولادى. ولار ەل اۋماعىنداعى، ونىڭ ىشىندە ودەسسا وبلىسىنداعى بارلىق باسسىزدىقتار پەن ءبانديتيزمدى قولاپ وتىر. سول ءۇشىن مەن وتستاۆكاعا كەتىپ، كۇرەسۋدىڭ جاڭا كەزەڭىن باستاماقپىن» - دەپ تۇسىندىرگەن بولاتىن.

ميحايل سااكاشۆيلي 2008-2013 جىلدارى ارالىعىندا گرۋزيا پرەزيدەنتى قىزمەتىن اتقارعان. پرەزيدەنتتىك قىزمەتتەن كەتكەننەن كەيىن گرۋزيادا ونىڭ ۇستىنەن بىرنەشە قىلمىستىق ءىس قوزعاعان بولاتىن. وسىعان بايلانىستى رەسمي تبليسي ۋكراينادان سااكاشۆيليدى ەكستراديتسيالاۋدى سۇراعان ەدى. بىراق كيەۆ بيلىگى ميحايل سااكاشۆيلي ۋكراينا ازاماتى بولعاندىعىنا بايلانىستى گرۋزيانىڭ بۇل ءوتىنىشىن ورىنداي المايتىندىعىن ايتقان ەدى.

ءشىلدىنىڭ 25 كۇنى ميحايل سااكاشۆيلي ءوزىنىڭ فەيسبۋك پاراقشاسىندا "قازىرگى تاڭدا اقش-تا ەكەندىگىن" ايتىپ، حابارلاما جازعان. وسىعان بايلانىستى ۋكراينا جوعارعى راداسىنىڭ دەپۋتاتى، پەتر پورشەنكو بلوگىنىڭ مۇشەسى سەرگەي لەششەنكو: «پەتر پوروشەنكونىڭ  جوسپارى اقش-تا جۇرگەن سااكاشۆيليدى ۋكراينا ازاماتتىعىنان شىعارۋ ارقىلى ەل اۋماعىنا كىرگىزبەي تاستاۋ. ەگەردە ول ۋكراينا جەرىنە كەلەتىن بولسا، وندا ونى بوريسپولعا قونعان ءبىرىنشى رەيسپەن گرۋزياعا ەكستراديتسيا جاسايتىن بولسامىز» - دەپ فەيسبۋك پاراقشاسىنا جازعان.

ميحايل سااكاشۆيلي ۋكراينا ازاماتتىعىنان شىعارعاننان كەيىن ءوزىنىڭ فەيسبۋك پاراقشاسىنا: «ەلدە جاڭا ساياسي كۇشتەردىڭ باس كوتەرە باستاۋىنا بايلانىستى پوروشەنكو وسىنداي ورەسكەل قاتەلىكتەرگە بارىپ وتىر» - دەپ جازدى.

ايتا كەتەتىن ءبىر جايت ميحايل سااكاشۆيلي گۋبەرناتورلىق قىزمەتتەن كەتكەننەن كەيىن ۋكراينادا «رۋح نوۆىح سيل» قوزعالىسىن قۇرعان بولاتىن. قازىرگى تاڭدا بۇل قوزعالىس ۋكراينا اۋماعىندا كۇش الا باستاعان.

“The Qazaq Times”