جاڭا زاڭ بويىنشا ترامپ پۋتينگە كومەكتەسە المايدى

اقش كونگرەسى وتكەن اپتانىڭ سوڭىندا كوپ رەت قارالعان رەسەيگە جاڭا سانكتسيا سالۋ زاڭ جوباسىن ماقۇلدادى. امەريكالىق زاڭ شىعارۋشىلاردىڭ كەزەكتى جوباسى الداعى جاز ايلارىنا دەيىن دايىن بولماق. سانكتسيا سولتۇستىك كورەيا مەن رەسەيدى قامتىعان جاڭا بۇعاتتاۋدى جۇزەگە اسىرعالى وتىر. وسىعان دەيىن «كەلسەڭ كەل» -گە  سالىپ كەلگەن كرەمل جاعى دۇيسەنبى كۇنى قارسى رەاكتسياسىن ءبىلدىردى. بۇل تۋرالى «تۇرىك تەلە-راديو» قىزمەتىنىڭ رەسمي سايتى حابارلايدى.

رەسەي پرەزيدەنتىنىڭ ءباسپاسوز حاتشىسى دميتري پەسكوۆ جاڭا سانكتسيا تۋرالى پىكىرىندە: «كرەمل بۇل زاڭدى ورىنسىز سانايدى. رەسەيگە قارسى زاڭ جوباسىندا ءتىپتى اقش پرەزيدەنتىنە دە سانكتسيانى جويۋعا قۇقىق بەرمەگەن»، – دەدى. سانكتسيا جوباسى رەسمي ءمالىم بولعاننان كەيىن رەسەي جاق بۇل زاڭ جوباسىن تەرىسكە شىعاردى. ءتىپتى بۇل ەكى ەل اراسىنداعى قارىم-قاتىناسقا كەسىرىن تيگىزەدى دەپ اشىق ايتتى. بۇنىسى الداعى ۋاقىتتا رەسەيدىڭ اقش-پەن بولعان قارىم-قاتىناسىنا ءتىپتى دە سالقىندىق تۋدىراتىنىن بىلدىرەدى.

رەسەيدىڭ ءىرى كومپانيالارىنىڭ ءبىرى «گازروم»-نىڭ بالتىق تەڭىزى جاعالاۋىنان ەۋروپاعا گاز جەتكىزۋشى «North Streem» گاز قۇبىرى جوباسى دا اقش-تىڭ بۇل رەتكى جاڭا سانكتسيا جوباسىنىڭ قاراۋىلىنا ءىلىنىپ وتىر. دەمەك، اقش-تىڭ جاڭا سانكتسياسى رەسەيمەن قوسا گەرمانيانى قامتىعان ءبىر قاتار ەۋروپا ەلدەرىنە دە اسەر ەتەتىنى انىق. ەڭ قىزىعى بۇل زاڭ جوباسى اقش پرەزيدەنتى دونالد ترامپتىڭ پرەزيدەنتتىك وكىلەتتىلىگىنە دە بەلگىلى دارەجەدە شەكتەۋلەر قويىپ وتىر. ياعني، رەسەيگە باعىتتالعان سانكتسيانى پرەزيدەنت ترامپ توقتاتا المايتىن بولىپ بەكىتىلگەن.

“The Qazaq Times”