قازاقستاندا يننوۆاتسيالىق گرانتتار جاڭا ەرەجە بويىنشا بەرىلەدى

قازاقستاندا يننوۆاتسيالىق گرانتتار جاڭا ەرەجە بويىنشا بەرىلەدى. «تەحنولوگيالىق دامۋ جونىندەگى ۇلتتىق اگەنتتىك» اق اق-نىڭ باسقارما باستىعى مارات وماروۆتىڭ سوزىنشە، گرانتتارعا ءوتىنىم 2017 جىلدىڭ 2 تامىزىنان 2 قازانىنا دەيىن قاعاز تۇرىندە قابىلدانادى، سونداي-اق «ۇتدا» اق-نىڭ رەسمي سايتىندا دا بەرۋگە بولادى. بۇل تۋرالى اگەنتتىكتىڭ ءباسپاسوز قىزمەتى حابارلادى. 

«ءبىز بيزنەس ۇدەرىستەردىڭ رەينجينيرينگىسىن وتكىزدىك جانە گرانتتار بەرۋ شارتتارىن جەتىلدىردىك. ەگەر بۇرىن كوبىنەسە بيزنەسكە ارنالعان جانە سوڭعى ءونىم شىعارىلىمىن ۇيعارمايتىن 9 ءتۇرلى گرانت تۇرلەرى كوزدەلگەن بولسا، قازىر ولار قارجىلاندىرۋ شەكتەرىن ارتتىرۋمەن 3 تۇرگە توپتاستىرىلدى» – دەيدى «تدۇا» اق-نىڭ باسشىسى مارات وماروۆ.

سونىمەن ۇلتتىق اگەنتتىك باسشىسى ايتقان 3 تۇرگە توپتاستىرىلعان گرانت تۇرلەرى مىنالار:

• قولدانىستاعى كاسىپورىنداردى تەحنولوگيالىق دامىتۋعا ارنالعان گرانت. بۇل بويىنشا گرانت سوماسى ليتسەنزيالىق شارت بويىنشا دالەلدى شىعىنداردىڭ 70%-ىنا دەيىنگى جانە (نەمەسە) جابدىق ساتىپ الۋ بويىنشا دالەلدى شىعىنداردىڭ  50%-ىنا دەيىنگى، اقشالاي تۇردە  400 ملن تەڭگەگە دەيىنگى سومانى قۇرايدى.

گرانت كاسىپورىننىڭ تەحنولوگيالىق دەڭگەيىن الدىڭعى قاتارلى، زاماناۋي وتاندىق جانە شەتەل تەحنولوگيالارىن ترانسفەرتتەۋ ارقىلى ارتتىرۋعا باعىتتالعان.

• سالالاردى تەحنولوگيالىق دامىتۋعا ارنالعان يننوۆاتسيالىق گرانتتىڭ جانە (نەمەسە) جابدىق ساتىپ الۋ بويىنشا دالەلدى شىعىنداردىڭ  50%-ىنا دەيىنگى جانە تەحنولوگيالىق قۇزىرەتتەردى ارتتىرۋدىڭ دالەلدى شىعىندارىنىڭ 85%-ىنا دەيىنگى، اقشالاي تۇردە  500 ملن تەڭگەگە دەيىنگى سومانى قۇرايدى.

گرانت نەگىزىنەن قولدانىستاعى سالالاردى الدىڭعى قاتارلى شەتەل تەحنولوگيالارىن، تاجىريبەلەرىن، بىلىمدەرىن جانە داعدىلارىن ترانسفەرلەۋ ارقىلى دامىتۋعا باعىتتالعان.

• تەحنولوگيالاردى كوممەرتسيالاندىرۋعا باعىتتالعان گرانتتىڭ مولشەرى جاريالانعان دالەلدى شىعىنداردىڭ  50%-ىنا دەيىنگى، اقشالاي تۇردە 200 ملن تەڭگەگە دەيىنگى سومانى قۇرايدى.

گرانت مەنشىكتى وندىرىستەگى عىلىمي نەمەسە عىلىمي-تەحنيكالىق قىزمەت ناتيجەلەرىن جەتىلدىرۋگە باعىتتالعان.

گرانت قايتارىمسىز نەگىزدە بەرىلەدى. 2011 جىلدان 2016 جىلعا دەيىنگى كەزەڭدە جالپى سوماسى 12,2 ملرد تەڭگە بولاتىن 328 شارت، سونىڭ ىشىندە 2016 جىلى جالپى سوماسى 1,9 ملرد تەڭگە بولاتىن 66 شارت جاسالدى.

ءباسپاسوز قىزمەتىنىڭ مالىمەتىنە سەنسەك، جالپى العاندا 2014 جىلدان باستاپ 2017 جىلدىڭ 1-ءشى جارتىسىنا دەيىن گرانت الۋشىلاردىڭ اقپاراتتارىنا سايكەس، يننوۆاتسيالىق گرانتتاردى ىسكە اسىرۋ ناتيجەسىندە 2 773 جۇمىس ورىندارى قۇرىلعان، 7,6 ملرد تەڭگەدەن ارتىق سالىق قاراجاتتارى تولەنىپ، جالپى سوماسى 131,4 ملرد تەڭگە بولاتىن ءونىم شىعارىلىپتى.

“The Qazaq Times”