اقش ازاماتتارىن سولتۇستىك كورەياعا ساياحاتتاي بارۋىنا تيىم سالدى. فوتو: The Wall Street Journal.

اقش ۇكىمەتى ءوز ازاماتتارىنا سولتۇستىك كورەياعا بارۋعا تىيىم سالدى. مەملەكەتتىك دەپارتامەنتتىڭ ءباسپاسوز حاتشىسى حيزەر نويەرت  شەشىم كەلەسى اپتادا فەدەرالدى رەگيستردە جاريالانىپ، 30 كۇن ىشىندە كۇشىنە ەنەدى دەپ جەتكىزدى. بۇل تۋرالى BBC اقپاراتتىق اگەنتتىگى جازادى.

اتالعان شەشىم "Young Pioneer Tours" قىزمەتىن پايدالانىپ، سولتۇستىك كورەياعا ساياحاتتاپ بارعان امەريكالىق ازامات وتتو ۆارمبەنىڭ 2016 جىلى قوناق ۇيدەگى پروپاگاندالىق پاراقشانى وزىمەن الىپ كەتكىسى كەلگەنى ءۇشىن، اۋەجايدا تۇتقىندالىپ، 15 جىلعا اباقتىعا جابىلعان وقيعاسىنا بايلانىستى قابىلدانىپ وتىر. ماۋسىم ايىندا امەريكالىق ستۋدەنت اقش-قا قايتارىلعانىمەن، ول وتانىنا ورالعان سوڭ، 1 اپتا ىشىندە كوز جۇمعان. ونىڭ جاقىندارى وتتو ۆارمبەنىڭ سولتۇستىك كورەيا تاراپىنان ازاپتى جازالاۋ شارالارىنا تارتىلعانىن، دەنساۋلىعىنا كەلتىرىلگەن زارداپتار اسەرىنەن جان تاپسىرعانىن  حابارلاعان بولاتىن.

قازىر سولتۇستىك كورەيانىڭ تۇرمەلەرىندە تاعى دا ءۇش اقش ازاماتى بار.  ولار "تىڭشىلىق" ارەكەتى ءۇشىن ۇستالىپ وتىرعان كيم دونگ چۋل، "مەملەكەتكە قارسى استىرتىن ساياساتى ءۇشىن" دەگەن ايىپ ارقالاعان، پحەنيان ۋنيۆەرسيتەتىنىڭ پروفەسسورلارى كيم سانگ دۋك پەن  كيم حەك سون.   اقش ۇكىمەتى ازىرگە ولاردى ەلگە قايتارا الماي وتىر.

سولتۇستىك كورەيادا تۋرلار ۇيىمداستىراتىن "Koryo Tours" جانە "Young Pioneer Tours" جەلىلەرى وكىلدەرىنىڭ اقپاراتىنشا، ولار اقش-تىڭ قابىلداعان شەشىمى تۋرالى جەرگىلىكتى شۆەتسيانىڭ ەلشىلىگىنەن بىلگەن. ويتكەنى ەكى ورتاداعى سالقىن قارىم-قاتىناسقا بايلانىستى سولتۇستىك كورەيادا اقش-تىڭ ديپلوماتيالىق يەلىكتەرى مەن ەلشىلىگى جوق. قازىر امەريكا ۇكىمەتى كورەيادا قانشا اقش ازاماتى بارىن تەكسەرىپ جاتىر جانە ولاردى تەز ارادا ەلگە ورالۋعا  شاقىردى. ويكەنى اقش ۇكىمەتى ءوز ازاماتتارىن سولتۇستىك كورەيا زااڭسىز ايىپتاۋلارمەن قولعا ءتۇسىرىپ، يادرولىق قارۋعا قاتىستى كەلىسسوزدەردە ءوز پايداسىنا پايدالانۋعا تىرىسىپ وتىر دەپ قاۋىپتەنەدى.

“The Qazaq Times”