«Exxon Mobil» كومپانياسى اقش ۇكىمەتىنىڭ ۇستىنەن سوتقا شاعىم ءتۇسىردى

اقش ۇكىمەتى "Exxon Mobil" مۇناي كونتسەرنىن رەسەيگە سالىنعان سانكتسيالارعا قاراماستان، "روسنەفت" كومپانياسىنىڭ باسشىسى يگور سەچينمەن كەلىسىمشارت جاساسقانى ءۇشىن ايىپتاپ، 2 ملن دوللار كولەمىندە ايىپپۇل سالدى. مۇناي كونتسەرنى اتالعان ايىپتاۋلارمەن كەلىسپەي، اقش ۇكىمەتىنە قارسى سوتقا شاعىم ءتۇسىردى. بۇل تۋرالى New York Times گازەتى جازادى. 

وتكەن جىلعى تابىسى 7, 84 ملرد دوللاردى قۇراعان "Exxon Mobil" كومپانياسى ءۇشىن 2 ملن دوللار ايىپپۇلدى تولەۋ قيىنعا سوقپايتىنى انىق. دەگەنمەن بۇل داۋدا جەڭىسكە جەتۋ كومپانيانىڭ بەدەلى ءۇشىن ماڭىزدى بولىپ وتىر.

2014 جىلى اقش ۇكىمەتى رەسەيدىڭ قىرىمدى اننەكتسيالاۋىنا بايلانىستى وعان قارسى بىرقاتار ەكونوميكالىق جانە ديپلوماتيالىق سانكتسيالار ەنگىزگەن بولاتىن. رەسەي ازاماتتارىنىڭ ەسىمدەرى قامتىلعان قارا تىزىمدە "روسنەفت" كومپانياسىنىڭ باسشىسى يگور سەچين دە بولعان. اقش-تىڭ قارجى مينيسترلىگىنىڭ شەت ەلدىك اكتيۆتەردى باقىلاۋ باسقارماسىنىڭ مالىمەتىنشە، "Exxon Mobil" كومپانياسى 2014 جىلدىڭ 14-23 مامىرى ارالىعىندا يگور سەچينمەن 8 قۇجاتقا  قول قويعان.

"Exxon Mobil" كومپانياسى ءوز مالىمدەمەسىندە، يگور سەچين قارا تىزىمدە تەك فيزيكالىق تۇلعا ەسەبىندە بولدى، جانە اتالعان سانكتسيا بۇل جاعدايدا ونىڭ جەكە اكتيۆتەرىنە عانا قولدانىلۋى كەرەك، ال كومپانيامەن كەلىسسوز جۇرگىزۋ شەكتەۋلەردەن تىس نارسە دەپ ەسەپتەيدى. ولاردىڭ ايتۋىنشا، سول كەزدەگى باراك وبامانىڭ اكىمشىلىگى ءدال وسىنداي تۇسىندىرمە بەرگەن.

بۇل شيەلەنىستىڭ تاعى ءبىر قىزىق تۇسى، "روسنەفت" كومپانياسىمەن  داۋلى كەلىسىمشارتتار جاسالعان تۇستا، "Exxon Mobil" مۇناي كونتسەرنىن اقش-تىڭ قازىرگى مەملەكەتتىك حاتشىسى رەكس تيللەرسون باسقارعان. دونالد ترامپتىڭ اكىمشىلىگى مەملەكەتتىك حاتشىنىڭ بۇرىنعى "قاتەلىكتەرى" تۋرالى ءالى رەسمي مالىمدەمە جاساعان جوق.

“The Qazaq Times”