كوممۋنالدىق قىزمەت اقىسى تولەنبەسە نەسيە بەرىلمەۋى مۇمكىن

الماتىلىقتاردىڭ جىل باسىنان بەرى ىستىق سۋ مەن جىلۋعا قارىزى 660 ملن تەڭگەگە جۋىق. بەرەشەگىن جىلداپ تولەمەيتىن تۇرعىندار ەندى جاپپاي كوممۋنالدىق جۇيەدەن اجىراتىلىپ جاتىر، دەپ حابارلايدى  الماتى تەلەارناسى.

ءتىپتى جۋىق ارادا كوممۋنالدىق قىزمەتتى دەر كەزىندە تولەمەگەندەر ەندى نەسيە الا الماي قالۋى مۇمكىن. ويتكەنى ءبىراز جىلدان بەرى قاراستىرىلىپ كەلگەن ماسەلە الداعى 2 ايدا جۇزەگە اسۋى ىقتيمال.

ياعني نەسيە بەرىلەر الدىندا ازاماتتاردىڭ كوممۋنالدىق تولەم بويىنشا قارىزىنىڭ بار-جوقتىعى تەكسەرىلەدى. مۇنداي قادامعا كورسەتكەن قىزمەتتەرىنە اقى وندىرە الماي جۇرگەن كاسىپورىندار بارعان. بۇل شارا ەڭ ءبىرىنشى الماتى تۇرعىندارىنا قاتىستى قولدانىلادى. سەبەبى كوممۋنالدىق تولەم جاساماي جۇرگەندەر وسى قالادا كوپ. مىسالى تەك ماۋسىم ايىنىڭ باسىنان بەرى قالادا 300-گە جۋىق نىساننىڭ ىستىق سۋعا قارىزى 35 ملن تەڭگەدەن اسقان.

«وسىدان بىرنەشە جىل بۇرىن ۇلتتىق نەسيە بيۋروسىمەن بىرىگىپ، بانكتەردەن نەسيە بەرەردە كليەنتتىڭ كوممۋنالدىق تولەمدەردى تولەۋ قابىلەتىن تەكسەرۋ ماسەلەسىن كوتەردىك. ەندى كوممۋنالدىق تولەمدى تولەي الماعاندار نەسيەنى دە جاپپايدى دەگەن ءسوز. بانكتەردە نەسيەنى قايتارۋدا ماسەلە تۋىنداۋى مۇمكىن. مەنىڭ ويىمشا، ءبىر-ەكى ايدىڭ كولىمەندە بۇل جوبا جۇزەگە اسادى»،- دەدى «الماتى جىلۋ جۇيەلەرى» جشس جىلۋ ەنەرگياسىن وتكىزۋ باسقارماسىنىڭ باسشىسى، ماحامبەت جانۇزاقوۆ.

ماماندار قارىزى بار تۇرعىنداردى ىستىق سۋ مەن جىلۋدان جاپپاي اجىراتۋ كەزەڭىن باستادى. ەندى قارىزى بارلار تولىعىمەن قىزمەتتەن قاعىلادى. ويتكەنى، ينجەنەرلەر بارىنشا حالىقتىڭ جاعدايىن ءتۇسىنىپ، وسى ۋاقىتقا دەيىن ەسكەرتۋ جاساپ كەلگەن.

“The Qazaq Times”