فوتو: astana.all.biz

استانادا  جەكەمەنشىك بالاباقشا سانى مەملەكەتتىك باقشا سانىنان اسىپ تۇسكەن. قازىرگى ۋاقىتتا قالادا مەكتەپكە دەيىنگى 263 مەكەمە جۇمىس ىستەيدى، ونىڭ ىشىندە 96 مەملەكەتتىك، 2 ۆەدومستۆولىق جانە 116 جەكە، 49 شاعىن ورتا  بار، دەپ حابارلايدى قالا اكىمدىگىنىڭ ءباسپاسوز قىزمەتى.

قالالىق ءبىلىم بەرۋ باسقارماسى باسشىسىنىڭ مىندەتىن اتقارۋشى انۋار جانعوزيننىڭ سوزىنشە، قازىر استانالىق باقشالارعا 46 062 بالا بارادى. ولاردىڭ 27 193-ءى مەملەكەتتىك، 14 854-ءى جەكە باقشاعا بارادى. شامامەن 6 مىڭ ءبۇلدىرشىن شاعىن ورتالىققا جانە مەكتەپكە دەيىنگى مەكەمەلەرگە (مەكتەپكە دايارلىق ورتالىقتارى) بارادى ەكەن.

ا. جانعوزيننىڭ سوزىنە قاراعاندا، مەكتەپكە دەيىنگى بالالاردىڭ سانى تۋ جانە كوشى-قون  كورسەتكىشىنىڭ وسۋىنە بايلانىستى ارتۋدا. قازىر استانادا بالاباقشا كەزەگىندە تۇرعان 33 مىڭنان استام بالا بار. ال كۇندەلىكتى شامامەن 90 بالا (60-70 ءسابي تۋادى) جانە كوشى-قون ەسەبىنەن 20 بالا بالاباقشا كەزەگىنە تۇرادى.

ءبىلىم باسقارماسى جىل سايىن مەملەكەتتىك تاپسىرىسپەن 10 مىڭ ورىندىق جەكە باقشا اشۋدى قولعا العان. وسىلايشا 2019 جىلدىڭ سوڭىنا دەيىن مەكتەپكە دەيىنگى بالالاردى  باقشامەن قامتۋ جوسپارلانۋدا. ول ءۇشىن 30 مىڭ ورىنعا ارنالعان 200-دەن استام بالاباقشا اشۋ كوزدەلىپ وتىر.

«مەملەكەتتىك تاپسىرىس 16 مىڭ تەڭگەدەن 23 مىڭ تەڭگەگە دەيىن ارتتى. كۇن سايىن جەكە بالاباقشاعا جولداما الاتىن بۇلدىرشىندەردىڭ سانى ارتۋدا. ءبىز بۇل كورسەتكىشتى 10 مىڭعا دەيىن ارتتىرۋدى جوسپارلاپ وتىرمىز»، - دەدى ا. جانعوزين.

 “The Qazaq Times”