پۋتين مەن ترامپ كەزدەسۋىنىڭ قورىتىندىسى بەلگىلى بولدى

رەسەيدىڭ سىرتقى ىستەر ءمينيسترى سەرگەي لاۆروۆ اقش پرەزيدەنتى دونالد ترامپ پەن رەسەي پرەزيدەنتى ۆلاديمير ءپۋتيننىڭ اراسىندا وتكەن كەزدەسۋدىڭ ناتيجەلەرى جونىندە ءباسپاسوز كونفەرەنتسياسىن وتكىزدى. 

سەرگەي لاۆروۆ قوس باسشىنىڭ اراسىنداعى كەلىسسوزدەرگە "كونسترۋكتيۆتى" دەگەن باعا بەرىپ، رەسەي مەن اقش-تىڭ ءوزارا ءتيىمدى ىنتىماقتاستىققا دايىن ەكەندىكتەرىن جەتكىزدى.

"بۇل شىنىندا، ۇزاق ءارى ماڭىزدى كەزدەسۋ بولدى. مەنىڭ ەكى ەل باسشىسى دا ءوز حالقىنىڭ ۇلتتىق مۇددەسىنە ادال، وسى جولدا ءوزارا ءتيىمدى كەلىسسوزدەر مەن ىنتىماقتاستىق جولىنداعى ارىپتەستىكتەرگە دايىن دەگەن بولجامىم اقتالدى. رەسەي مەن اقش اراسىنداعى كونفرونتاتسيالىق ستسەناريلەر قوس مەملەكەت ءۇشىن دە ءتيىمسىز", - دەگەن سەرگەي لاۆروۆتىڭ ءسوزىن اقش پرەزيدەنتى دونالد ترامپ تا قولدادى.

ول: "ماسكەۋ مەن ۋاشينگتوندى ەندى الدا كوپ جاقسى وقيعالار كۇتەدى", - دەدى.

دونالد ترامپ پەن ۆلاديمير پۋتين اراسىنداعى كەلىسسوزدەر بارىسىندا سولتۇستىك كورەيانىڭ جاعدايى تالقىلانىپ، 9 شىلدەدەن باستاپ سيريانىڭ دەراا، كۋنەيترا جانە سۋۆەيدا اۋداندارىندا ەكى ەل بەيبىت كەلىسىمگە كەلەتىن بولدى.

اتاپ ءوتۋ كەرەك، گامبۋرگتە ءوتىپ جاتقان G20 ءسامميتىنىڭ اياسىندا ۇيىمداستىرىلعان كەزدەسۋ ەڭ ۇزاعى جارتى ساعاتقا سوزىلادى دەپ كۇتىلگەن بولاتىن. دەگەنمەن ەكى ەل پرەزيدەنتى اراسىنداعى كەشەگى سۇحبات 2 ساعاتقا سوزىلدى.

“The Qazaq Times”