اقش كورەيا بىرلەسكەن ارمياسىنىڭ كورەي تۇبەگىنىڭ شىعىسىنداعى ارالدارداعى زىمىراندارى ىسكە قوسىلدى. فوتو: The Wall Street Journal

اقش سولتۇستىك كورەياعا سوعىس ەسكەرتۋىن جاسادى. اقۇي تارابىنان اشۋلى تۇردە ايتىلعان بۇل ەسكەرتۋدە، اقش-تىڭ سوعىسقا دايىن ەكەنى دە ايتىلعان. قازىرگى تاڭدا سەيسەنبى كۇنى ۇشىرىلعان قۇرلىقارالىق بالليستيكالىق زىمىراننان كەيىن، سولتۇستىك كورەيا وزدەرىنىڭ بالليستيكالىق زىمىراندى دامىتۋداعى جەتىستىگىن رەسمي تۇردە حابارلاعان بولاتىن.

تانىمال باسىلىم «The Wall Street Journal» باسىلىمىنىڭ حابارلاۋىنشا، سولتۇستىك كورەيا بۇل جولى ءوزىنىڭ زىمىراندارىن اقش تەرريتورياسىنا جەتكىزۋ قابىلەتىنىڭ بار ەكەنىن ايگىلەدى. سارسەنبى كۇنى اتالعان ەلدىڭ رەسمي ارنالارى وزدەرىنىڭ جەتىستىگىن ماقتانا جاريا ەتتى. مالىمەتتەرگە قاراعاندا بۇل جولى سىناقتان وتكىزىلگەن زىمىران اتموسفەرا قاباتىنان شىعىپ قايتا كىرگەن كەزدە پايدا بولاتىن جوعارى تەمپەراتۋرا مەن قىسىمعا توزىمدىلىگىن تانىتقان.

كەيبىر الەمدىك باسىلىمدار كحدر-نىڭ كەزەكتى بالليستيكالىق زىمىران سىناعىنىڭ راستىعىنان كۇماندانادى. ولار، ەگەر شىنىمەن سولتۇستىك كورەيا ءساتتى سىناق جاساعان بولسا، وندا، وقتۇمسىقتارىن اقش قالالارىنىڭ بىرىنە قاراي باعىتتايتىن ەدى دەيدى. مەيلى قالاي بولسا دا، اقش-سولتۇستىك كورەيا شيەلەنىسى شىرقاۋ شىڭىنا شىققالى تۇر. وڭتۇستىك كورەياداعى اقش ارمياسىنىڭ باس قولباسشىسى ادميرال ۆينسەنت برۋكس سارسەنبى كۇنى جولداعان مالىمەتىندە: «ەگەر بۇيرىق تاپسىرىپ الاتىن بولساق، اقش-كورەيا بىرلەسكەن ارمياسى سولتۇستىك كورەياعا سوعىس اشۋعا دايىن»، – دەدى.

بۇگىن تۇستەن بۇرىن اقش-كورەيا بىرلەسكەن ارمياسى كۇردەلى سوعىس جاتتىعۋلارىن جۇزەگە اسىردى. ولار كورەيا تۇبەگىنىڭ شىعىسىنداعى شاعىن ارالدارداعى زىمىراندارىن قوزعالىسقا كەلتىرگەن. سونىمەن بىرگە حابارلاما جاريالاپ، بۇل سولتۇستىك كورەياعا جاسالعان سوعىس ەسكەرتۋى ەكەنىن ايتتى.

“The Qazaq Times”