رەسەي باتىس ەلدەرىنەن اكەلىنەتىن تاۋارلارعا ازىق-تۇلىك ەمبارگوسىن ۇزارتتى

رەسەي فەدەراتسياسىنىڭ پرەمەر-ءمينيسترى دميتري مەدۆەدەۆ رەسەيگە قارسى سانكتسيالار ەنگىزگەن اقش، كانادا، ەۋرووداق ەلدەرى، اۆستراليا مەن ۋكراينادان  ازىق-تۇلىك جانە اۋىل شارۋاشىلىق ونىمدەرىن الۋعا تىيىم سالاتىن قۇجاتتىڭ مەرزىمىن 2018 جىلدىڭ 31 جەلتوقسانىنا دەيىن ۇزارتۋ تۋرالى جارلىققا قول قويدى. بۇل تۋرالى رەسەي فەدەراتسياسى مينيسترلەر كابينەتىنىڭ رەسمي سايتىندا جاريالاندى. 

حابارلامادا: "2018 جىلدىڭ 31 جەلتوقسانىنا دەيىن رەسەيگە اقش، ەۋرووداق، كانادا، اۆستراليا، نورۆەگيا كورولدىگى، ۋكراينا، البانيا رەسپۋبليكاسى، چەرنوگوريا، يسلانديا رەسپۋبليكاسى، ليحتەنشتەين كنيازدىگى ەلدەرىندە وندىرىلگەن اۋىل-شارۋاشىلىق جانە ازىق-تۇلىك ونىمدەرىن الۋعا قويىلعان ەمبارگو ۇزارتىلادى", - دەلىنگەن.

اتاپ ءوتۋ كەرەك، 28 ماۋسىم كۇنى ەۋرووداق كەڭەسى اعىمداعى جىلدىڭ شىلدە ايىنىڭ سوڭىندا اياقتالاتىن رەسەيگە قاتىستى قولدانىلعان ەكونوميكالىق شەكتەۋ شارالارىنىڭ مەرزىمىن تاعى دا جارتى جىلعا ۇزارتۋ تۋرالى شەشىم قابىلداعان بولاتىن. ءوز كەزەگىندە رەسەي فەدەراتسياسىنىڭ پرەزيدەنتى ۆلاديمير پۋتين باتىس ەلدەرىنىڭ سانكتسيالارىنا جاۋاپ رەتىندە ازىق-تۇلىك ەمبارگوسى 2018 جىلدىڭ 31 جەلتوقسانىنا دەيىن ءوز كۇشىندە قالاتىنىن مالىمدەدى.

“The Qazaq Times”