وڭتۇستىك قىتاي 3 ماۋسىم تۇستەن كەيىن. فوتو: sinovision.net.

وڭتۇستىك قىتايدا تولاسىز جاۋىننان ون ميلليون ادام زارداپ شەكتى. ازىرگە دەيىن ايماقتاعى توقتاۋسىز جاۋعان جاۋىن 78 ادامنىڭ ءومىرىن جالماعان. رەسمي اقپارات كوزدەرى زارداپ شەككەندەر سانى 11 ميلليوننان استى دەپ حابارلاۋدا. بۇل تۋرالى اقش-تىڭ قىتاي ءتىلدى سايتى Sinovision.net «شينحۋا» اگەنتتىگىنە سىلتەمە جاساي وتىرىپ حابارلايدى.

بۇل جولعى تولاسسىز سەلدەن جىجياڭ، انحۋەي،  جياڭشي، حوۋبەي، ءيۇننان، سىچۋان قاتارلى 11 پروۆينتسياداعى 61 قالانىڭ تۇرعىندارى زارداپ شەكتى. رەسمي ساناقتارعا قاراعاندا، اتالعان وڭىرلەردە 56 ادام ءولىپ، 22 ادام ءىز-ءتۇسسىز جوعالعان. 27 مىڭ تۇرعىن ءۇي قۇلاپ،  37 مىڭ ءۇي اۋىر دارەجەدە بۇزىلعان، 18 مىڭ 400 ءۇي جەڭىل بۇلىنگەن. اپاتتىڭ الىپ كەلگەن جالپى  ەكونوميكالىق شىعىنى 252,7 ميلليارد يۋانعا (شامامەن 36,1 ميلليارد اقش دوللارىنا تۋرا كەلەدى)  جەتكەن.

قىتايدىڭ باسقا وڭىرلەرى اتتانىسقا كەلىپ،  اتالعان ايماقتارعا كومەك بەرۋدە. قازىرگە دەيىن كومەككە 18,8 ميلليارد يۋان (2,72 ميلليارد اقش دوللارى) قارجى جينالعان. قىتاي ۇكىمەتى 11 پروۆينتسيانى ءتورتىنشى  دارەجەلى اپاتتى ايماق رەتىندە، ەل كولەمىندە شۇعىل جاعدايدا قۇتقارۋ بۇيرىعىن جاريالادى. زارداپ شەككەندەرگە 3300 ىقتاسىن شاتىرلار مەن 30 مىڭ كورپە-جاستىق، 24 مىڭ جينالمالى توسەكتەر جەتكىزىلگەن.

ادىلەت احمەتۇلى

“The Qazaq Times”