فوتو: ontustik.gov.kz

شىمكەنت مۇناي وڭدەۋ زاۋىتىن جاڭعىرتۋ جوباسىنىڭ ءبىرىنشى كەزەڭى اياقتالدى. ناتيجەسىندە مۇناي وڭدەۋ تەرەڭدىگى 80 پايىزعا ارتىپ، ءونىم شىعارۋ كولەمى جىلىنا 6 ملن تونناعا، جانارماي ءوندىرىسى 3 ەسە كوبەيدى. سونداي-اق، ەۋرو-4 جانە ەۋرو-5 ەكولوگيالىق ستاندارتپەن جانارماي شىعارىلا باستادى،  دەپ حابارلايدى وقو اكىمدىگىنىڭ ءباسپاسوز قىزمەتى. 

وسى جۇمىستار بويىنشا بولعان سالتاناتتى جيىنعا  قىتاي حالىق رەسپۋبليكاسىنىڭ  CNPC كومپانياسى باس ديرەكتورى  بيان  دىجى  مەن وڭتۇستىك قازاقستان وبلىسىنىڭ اكىمى جانسەيىت تۇيمەباەۆ قاتىسىپ، زاۋىت جۇمىسىنا ساتتىلىك تىلەدى.

جاڭعىرتۋ جۇمىستارىنىڭ ءبىرىنشى كەزەڭىندە شىمكەنت مۇناي وڭدەۋ زاۋىتىندا شيكىزاتتى ىدىستارعا ساڭىلاۋسىز قۇياتىن قوندىرعى ىسكە قوسىلدى. سونداي-اق قۋاتى جىلىنا 1,5  ملن توننا ديزەل وتىنىن گيدروتازالايتىن جانە جىلىنا 4 مىڭ توننا كۇكىرت وندىرەتىن قوندىرعى ىسكە قوسىلىپ جۇمىس ىستەي باستادى.  ايتا كەتەيىك، يننوۆاتسيالىق تىڭ تەحنولوگيالار اۆتوماتتى تۇردە باسقارىلادى.

مامانداردىڭ ايتۋىنشا، بۇدان بىلاي اۋا لاستانبايدى. ەڭ باستىسى – زاۋىتتاعى جۇمىستاردىڭ ءبارى قاۋىپسىز ىسكە اسىرىلاتىن بولادى. كاسىپورىن مۇنداي مۇمكىندىككە «ۇدەمەلى يندۋستريالدى يننوۆاتسيالىق دامۋ» باعدارلاماسى اياسىندا قول جەتكىزىپ وتىر.

ايتا كەتەيىك، 2 كەزەڭنەن تۇراتىن شىمكەنت مۇناي وڭدەۋ زاۋىتىن جاڭعىرتۋ جوباسى «ۇدەمەلى يندۋستريالدى يننوۆاتسيالىق دامۋ» باعدارلاماسى اياسىندا 2011 جىلى باستالعان بولاتىن. جوبانىڭ باس مەردىگەرى – قىتايلىق سرەسس كومپانياسى. جوبانى ىسكە اسىرۋعا 30-دا اسا جەرگىلىكتى مەردىگەر كومپانيالار تارتىلعان. بۇگىندە زاۋىت اكتسياسى «قازمۇنايگاز-ءوم» اق مەن قىتايلىق «سNPC» كومپانياسىنا تيەسىلى.

سونداي-اق زاۋىتتا جىلىنا 4 مىڭ توننا كۇكىرت شىعارىلادى. قۇرىلىمداۋ جۇمىستارىنىڭ ەكىنشى كەزەڭى تولىق اياقتالسا، زاۋىت ەلىمىزدەگى الەمدىك تالاپتارعا ساي ءىرى كاسىپورىنعا اينالاتىن بولادى. جىل سايىن شىمكەنت مۇناي وڭدەۋ زاۋىتىنان ىشكى، سونداي-اق سىرتقى نارىقتارعا 4 ملن تونناعا جۋىق مۇناي ونىمدەرى تيەپ جونەلتىلەدى.

“The Qazaq Times”