ۇلتتىق قورعا تۇسكەن ءتۇسىم ارتىپتى

2017 جىلدىڭ قاڭتار-مامىر ايلارىندا ۇلتتىق قورعا سالىق پەن تولەمدەردەن 987,8 ملرد تەڭگە ءتۇستى.

مەملەكەتتىك كىرىستەر كوميتەتىنىڭ مالىمەتىنشە، بۇل كورسەتكىش ءبىر جىل بۇرىن 547,6 ملرد تەڭگەنى قۇراعان. ياعني بيىل قارجى ءتۇسىمى 80,4%-عا ءوسىپ وتىر ەكەن.

تۇسىمدەردىڭ كوپ بولۋى ادەتتەگىدەي مۇناي سەكتورىنداعى جاعدايمەن بايلانىستى. سونىمەن مۇناي سالاسىنداعى ۇيىمداردان تۇسكەن سالىق 71,6%-عا ارتىپ، 62,9 ملرد تەڭگەنى قۇرادى. ال پايدالى قازبالاردى قازۋمەن اينالىساتىن ۇيىمداردىڭ تولەگەن سالىعى 3,2 ەسەگە ءوسىپ، 145,8 ملرد تەڭگەدەن 473,5 ملرد تەڭگەگە دەيىن ارتقان.

سونداي-اق، ەكسپورتتالاتىن شيكى مۇناي مەن گاز كوندەنساتىنان رەنتا سالىعى كوبەيگەن. مىسالى 2016 جىلدىڭ قاڭتار-مامىر ايىندا رەنتا سالىعى بويىنشا 28,2 ملرد تەڭگە تۇسكەن، ال وسى جىلدىڭ سايكەس كەزەڭىندە بۇل كورسەتكىش 94,3 ملرد تەڭگە بولدى (3,3 ەسە ءوسىم).

بۇدان بولەك تابيعات رەسۋرستارىن پايدالانۋشى مۇناي گاز سەكتورى ۇيىمدارىنىڭ زالالدار ءۇشىن تولەگەن تولەمدەرى 19 ملرد تەڭگەگە جەتتى، وتكەن جىلى 4,3 ملرد تەڭگە عانا بولعان (4,3 ەسە ءوسىم).

الايدا ورتالىق مەملەكەتتىك ورگاندار تاراپىنان مۇناي سالاسىنا سالىناتىن اكىمشىلىك سالىقتار، ءوسىمپۇلدار، سانكتسيالار سانى كوبەيگەن. 2016 جىلدىڭ العاشقى بەس ايىندا تولەمنىڭ مۇنداي تۇرلەرى 37,5 ملن تەڭگەنى قۇراسا، وسى جىلى 3,2 ملرد تەڭگە بولعان، ياعني قارجى كولەمى 85,1 ەسەگە وسكەن.

ايتا كەتەيىك، قر پرەزيدەنتى نۇرسۇلتان نازارباەۆ جىل سايىنعى ءداستۇرلى جولداۋىندا «ۇلتتىق قوردان الىنعان كەپىلدەندىرىلگەن ترانسفەرت كولەمى 2020 جىلعا قاراي كەزەڭ-كەزەڭ بويىنشا 2 تريلليون تەڭگەگە قىسقارتىلۋعا ءتيىس»، دەپ مالىمدەگەن. ال كەيىن پرەزيدەنت بانك سەكتورىن ساۋىقتىرۋ ۇشىن ۇلتتىق قوردان اقشا ءبولۋ تۋرالى قاۋلىعا قول قويدى.

“The Qazaq Times”