مۇسىلمان ەلدەرى اراسىنداعى داۋ-جانجال ۇزاققا جالعاسقالى تۇر

ساۋد ارابياسى باستاعان اراب ەلدەرىنىڭ بىرلەسە كاتارعا ورناتقان ديپلوماتيالىق داعدارىسى سوڭعى جىلدارداعى وڭىردەگى ەڭ ۇلكەن ديپلوماتيالىق قايشىلىق بولىپ قالدى. ال، جاقىندا اراب ەلدەرى كاتارعا سالىنعان سانكتسيانى الۋ ءۇشىن ءوز تالاپتارىن قويعان بولاتىن. 13 ءتۇرلى تالاپتىڭ اراسىندا «ءال-جازيرا» تەلەارناسىن توقتاتۋ جانە تۇركيانىڭ كاتارداعى اسكەري بازالارىن جابۋ كەرەك دەگەن تالاپ تا بار.

“The Wall Street Journal” باسىلىمىنىڭ حابارلاۋىنشا، اتالعان تالاپتار جاريالانا سالىپ، بىرنەشە ساعات وتكەننەن كەيىن تۇركيا تارابى ارنايى حابارلاما جاريالاپ، كاتارداعى ءوز اسكەري بازالارىن كوشىرۋ نيەتىنىڭ جوق ەكەنىن ايتتى. ساۋد ارابيا باستاعان ەلدەردىڭ تالابى ءۇشىن، 2014 جىلى جاساسقان ەكىجاقتى كەلىسىمگە قايشىلىق جاسامايتىندارىن ايتىپ ءوتتى. رامازان ايىندا باستالعان مۇسىلمان ەلدەرى اراسىنداعى بۇل قايشىلىق جاقىن ارادا شەشىمىن تابا قويماسى انىق. سەبەبى، ساۋد ارابياسى باستاعان ەلدەردىڭ شارتتارىنا كاتار جاعى كەلىسىم بەرە المايدى.

اراب ەلدەرى قويعان تالاپ اراسىندا كاتارعا «مۇسىلمان باۋىرلار»، ليۆان قارۋلى كۇشتەرى، «حەزبوللا» جانە وزگە ۇيىمدارمەن ات كەكىلىن كەسىسۋ كەرەكتىگى ايتىلعان. سەبەبى، ساۋد ارابياسى مەن ونىڭ وداقتاستارى بۇل اتالعان ۇيىمداردى باستى تەررورلىق توپتار بولىپ، شىعاناق ايماعىنا قاۋىپ توندىرەدى دەپ سانايدى. وعان قوسا جولدامادا كورسەتىلۋىنشە،  تيميم بين حاماد ءال-تاني باسشىلىق ەتكەن كاتار ۇكىمەتى بۇل تالاپتاردى ون كۇن ىشىندە قابىلداۋ شەشىمىن جاريالاۋ كەرەك ەكەن. بۇل تالاپتاردى قابىل المايتىن بولسا ساۋد ارابياسى باستاعان ەلدەر كەز-كەلگەن ۋاقىتتا كاتارعا قارسى جازالاۋ الىپ بارماق. ايتالىق، كاتار وپپوزيتسيالىق كۇشتەرگە اقپاراتتىق قولداۋ بەرىپ، ىقپالى ارتىپ وتىرعان «ءال-جازيرا» تەلەارناسى ءۇشىن ايىپپۇل تولەۋى ءتيىس.

“The Qazaq Times”