جارناما سالاسىنداعى زاڭبۇزۋشىلىقتار زاڭمەن جازالاناتىن بولادى

قازاقستانداعى ءماجىلىس دەپۋتاتتارى سارسەنبىدە پلەنارلىق ءماجىلىس بارىسىندا جارناما ماسەلەلەرى جونىندەگى زاڭناماعا ەنگىزىلگەن تۇزەتۋلەرى العاشقى وقىلىمنان-اق ماقۇلدانعان بولاتىن.

زاڭ جوباسى، بۇل رەتتە، جارناما سالاسىنداعى زاڭناما بۇزىلعان كەزدەگى اكىمشىلىك جاۋاپكەرشىلىكتى بەلگىلەپ وتىر.

سۇلەيمەنوۆ «جارناما تۋرالى» زاڭدا بۇگىننىڭ وزىندە جارناما سالاسىندا بىرقاتار تىيىمدار مەن شەكتەۋلەر بار ەكەندىگىن اتاپ كورسەتتى. دەگەنمەن، ولار تاجىريبە جۇزىندە قولدانىلىپ جۇرگەن جوق جانە ول بويىنشا اكىمشىلىك جاۋاپكەرشىلىك جوق بولعاندىقتان ءارى وكىلەتتى ورگانداردىڭ اكىمشىلىك جاۋاپكەرشىلىككە تارتۋ جونىندەگى تاجىريبەسىنىڭ جوقتىعىنا وراي، سۋبەكتىلەر تاراپىنان ەلەنبەۋدە. وسىعان بايلانىستى جارناما سالاسىنداعى اكىمشىلىك جاۋاپكەرشىلىك تۇرلەرىن ديسپوزيتسيالاۋ ايقىندالىپ وتىر.

«ەكونوميكانى دوللارسىزداندىرۋ بويىنشا جۇرگىزىلىپ وتىرعان ساياساتتى ەسكەرە وتىرىپ، قازاقستان رەسپۋبليكاسىنىڭ اۋماعىندا تاۋار ساتۋ كەزىندە ونىڭ باعاسىن ۇلتتىق ۆاليۋتادا كورسەتپەگەنى ءۇشىن اكىمشىلىك جاۋاپكەرشىلىك ەنگىزىلدى»، - دەدى سۇلەيمەنوۆ.

ونىڭ ايتۋىنشا، جوسىقسىز، كۇماندى، بەيادەپ جانە جاسىرىن جارناما بەرگەنى ءۇشىن، سونداي-اق، ۇلتتىق ازا تۇتۋ كۇندەرى  تەلە-راديارنالاردا جارناما بەرگەنى ءۇشىن جاۋاپكەرشىلىك بەلگىلەنىپ وتىر.

«الكوگول مەن تەمەكىنى جاسىرىن جارنامالاۋعا جول بەرمەۋ ءۇشىن، ءتۇرلى ءىس-شارالاردى وتكىزۋ تۇرىندەگى، ونىڭ ىشىندە الكوگولدىك ونىمدەرگە، تەمەكى جانە تەمەكى بۇيىمدارىنا سۇرانىس پەن قىزىعۋشىلىقتى ارتتىرۋعا باعىتتالعان جۇلدەلەر، لوتورەيا ويىندارىن جارنامالاعانى ءۇشىن جاۋاپكەرشىلىك ەنگىزىلدى»، - دەدى مينيستر.

ول كاسىپكەرلەردىڭ قارجىلىق جۇكتەمەلەرىن ۇلعايتۋعا جول بەرمەۋ ماقساتىندا اقك ارقىلى بەلگىلەنگەن جازالاۋلاردىڭ كولەمى قايتا قاراستىرىلماعاندىعىن اتاپ ءوتتى.

سونىمەن قاتار، زاڭ جوباسى ارقىلى تەلەارنالار مەن راديوارنالاردا الەۋمەتتىك جارنامالاردى تاراتۋ تەتىگى بەلگىلەندى.

كونتەنتتى جانە الەۋمەتتىك جارنامانى تاراتۋ ءتارتىبىن ناقتى رەتتەۋ قاجەتتىگى ءپىسىپ-جەتىلگەندىگى بەلگىلى. سوندىقتان دا، مىندەتتى 15 تەلەارنالار مەن راديوارنالاردا قايتارىمسىز نەگىزدە ورنالاستىرىلاتىن الەۋمەتتىك جارنامالاردىڭ كۇن سايىنعى كولەمىن بەلگىلەۋ ۇسىنىلىپ وتىر.

“The Qazaq Times”