قىزىلوردا وبلىسىندا كوممۋنالدىق قىزمەتتەردىڭ بىرىڭعاي تولەم جۇيەسى ەنگىزىلمەك. ايماق باسشىسى قىرىمبەك كوشەرباەۆتىڭ توراعالىعىمەن وسى ماسەلەلەگە ارنالعان كەڭەس ءوتتى، دەپ حابارلايدى وبلىس اكىمدىگىنىڭ ءباسپاسوز قىزمەتى.   

«بىرىڭعاي تولەم قۇجاتىنىڭ باستى ماقساتى - تۇتىنۋشىلاردىڭ كورسەتىلگەن قىزمەتتەر بويىنشا تولەم جۇرگىزۋىن جەڭىلدەتۋ، ياعني قىزمەت كورسەتۋشى مەكەمەلەردى ارالاماي، بارلىق قىزمەتتەرگە ءبىر جەردەن تولەم جاساۋ، ءتيىمسىز تولەمدەردى قىسقارتۋ بولىپ تابىلادى. اتالعان تاجىريبە استانا، الماتى قالالارىندا كەڭىنەن قولدانىلۋدا»،- دەپ اتاپ ءوتتى ايماق باسشىسى.

شىلدە ايىندا قالانىڭ «اقمەشىت» جانە «مەرەي» مولتەك اۋداندارىندا بىرىڭعاي تولەم قۇجاتى پيلوتتىق جوباسى ىسكە اسىرىلا باستايدى. ال، اعىمداعى جىلدىڭ كۇزىندە قالا تۇگەلدەي بۇل جۇيەگە قوسىلاتىن بولادى. بۇل تۋرالى ماجىلىستە «قىزىلوردا جارىعى» حولدينگتىك بىرلەستىگىنىڭ اتقارۋشى ديرەكتورى ەركەبۇلان ەسەنباەۆ جانە وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى مەدەت ۋساين  مالىمدەدى.

“The Qazaq Times”