يران ءمينيسترى ساۋد ارابياسىنىڭ لاڭكەستىك شابۋىل ۇيىمداستىرعانىن دالەلدەدى

يران سىرتقى ىستەر مينيسترلىگىنىڭ باسشىسى زاريف يرانداعى لاڭكەستىك شابۋلداردىڭ ارتىندا ساۋد ارابياسى تۇر دەپ كەسەتە ايتتى. ول بۇل سوزىنە قاتىستى دالەلدەرىن دە ورتاعا سالدى. بۇل تۋرالى «پارس.اقپارات» اگەنتتىگىنىڭ رەسمي سايتى جازىپ وتىر.

يران سىرتقى ىستەر ءمينيسترى مۇحاممەد جابباد زاريف سەيسەنبى كۇنگى وتكەن «وسلو» فورۋمىندا ساۋد ارابياسىنىڭ تاق مۇراگەنىنىڭ ءسوزىن العا تارتا كەلىپ، بۇل ناعىز ارانداتۋشىلىق، ماقساتتى جاۋلىقتى كوزدەپ وتىر دەپ ايىپتادى. اتالعان اقپارات اگەنتىگىنىڭ حابارلاۋىنشا، وسىدان بۇرىن ساۋد ارابياسىنىڭ تاق مۇراگەرى ءارى سول ەلدىڭ قورعانىس مينيسترلىگىنىڭ باسشىسى مۇحاممەد بەن سالمان رەسمي تەلەارناعا بەرگەن سۇحباتىندا: «سوعىستى يراننىڭ ىشىنە الىپ بارىپ، يراندى سوعىس مايدانىنا اينالدىرامىز»، – دەگەن.

«وسلو» فورۋمىندا يراندىق مينيسترگە: «يران لاڭكەستىك شابۋىل ءۇشىن نەلىكتەن ساۋد ارابياسىن كىنالاپ وتىر؟» دەگەن سۇراۋ قويىلدى. زاريف بۇعان: «سەبەبى، يراندا لاڭكەستىك شابۋىل بولعان كۇنى ساۋد ارابياسى قورعانىس مينيسترلىگىنىڭ تۆيتتەر پاراقشاسىندا وسى تۋرالى حابار بارىنەن بۇرىن جاريالاندى. يران ءوز قاۋىپسىزدىگىن تولىق باقىلاۋعا الىپ وتىر. سونىمەن بىرگە، ەلدىڭ شىعىس ايماقتارىندا كەيبىر قارۋلى توپتاردىڭ ارەكەت ەتىپ جاتقانىندا تولىقتاي بىلەدى. ولار وسىدان ەكى اي بۇرىن ايماقتا 9 ادامدى ءولتىرىپ، كورشىلەس ەلدەر اراسىنداعى شيەلەنىستى پايدالانىپ، يراننىڭ تىنىشتىعىن بۇلدىرۋگە دايىندالىپ وتىر»، – دەپ جاۋاپ بەردى.

يران ءمينيسترى ءسوز سوڭىندا: «يران ۇكىمەتى ءبىر عانا  يران ەمەس، كورشىلەس كاتار مەن ساۋد ارابياسىنىڭ دا قاۋىپسىزدىگىنىڭ ساقتالعانىن»، – قالايدى دەپ ەسكەرتتى.

“The Qazaq Times”