لوندون قالاسىنىڭ باتىسىندا كوپ قاباتتى تۇرعىن ءۇي ورتكە وراندى. وقيعا بولعان ورىننان تۇسىرىلگەن ۆيدەولارعا قاراعاندا ءورت تۇرعىن ءۇيدى تۇتاستاي شارپىعان. سولتۇستىك كەنسينگتون رايونىنداعى Grenfell Tower عيماراتىنا 40-قا جۋىق ءورت ءسوندىرۋشى كولىكتەر جينالدى. 200 ءورت ءسوندىرۋشى قىزمەتكەر تارتىلسا دا ءورتتى توقتاتۋ قيىنعا سوققان. بۇل تۋرالى BBC ارناسىنىڭ رەسمي سايتى حابارلادى.

لوندون ءورت قاۋىپسىزدىگى قىزمەتىنىڭ حابارلاۋىنشا، عيماراتتىڭ 2-ءشى قاباتىنان تارتىپ 27-قاباتىنا دەيىن تۇتاستاي ءورت شارپىعان. تۇتىنگە تۇنشىعىپ قالعاندار ەمحاناعا جەتكىزىلىپ، العاشقى دارىگەرلىك كومەك كورسەتىلدى. الايدا قازىرگە دەيىن زارداپ شەككەندەردىڭ ناقتى سانى تۋرالى مالىمەت بەرىلگەن جوق.

پوليتسيا تارابىنىڭ بەرگەن حابارىندا ادامداردى ورتتەن ەۆاكۋاتسيالاۋ جۇرگىزىلىپ جاتىر. بىراق عيماراتتا قانشا ادام بولعانىن، ونىڭ قانشاسى ورتتەن قاشىپ شىققانى تۋرالى ناقتى مالىمەت جوق. ءورتتىڭ شىعۋ سەبەبى دە انىق ەمەس. بىلەتىندەردىڭ ايتۋىنشا، عيماراتتا 200 پاتەر بولعان.

كەي ادامدار الەۋمەتتىك جەلىگە ءورت ىشىندە تالاي ادامنىڭ قۇتقارۋ تىلەپ تۇرعانىن جازدى. پوليتسياعا جانە ءورت قاۋىپسىزدىگى ورگاندارىنا ءورت تۋرالى حابار سول جەردىڭ جەرگىلىكتى ۋاقىتىمەن تۇنگى ساعات 01:16 دا كەلىپ تۇسكەن.

“The Qazaq Times ”