استانا ەكسپو-2017 ءباسپاسوز ورتالىعىندا ۇسىنىلعان اقش پاۆيلونىندا كورمە قوناقتارىنا جاڭا تەحنولوگيالار مەن يننوۆاتسيالار تانىستىرىلادى. قر-داعى اقش-تىڭ توتەنشە جانە وكىلەتتى ەلشىسى، اقش پاۆيلونىنىڭ كوميسسارى دجوردج كرول ەكسپوزيتسيا تۋرالى كەزدەسۋدە تولىق ايتىپ بەردى دەپ حابارلاندى قر ۇكىمەتىنىڭ رەسمي سايتىندا.

قوناقتارعا امەريكادان كەلگەن پاۆيلوننىڭ ستۋدەنت-ۋاكىلدەرى كومەكتەسەتىن بولادى. 40 ادام بىرنەشە شەت تىلدەرىن مەڭگەرگەن، سونىڭ ىشىندە ورىس جانە قازاق تىلدەرى دە بار، سونداي-اق ولار ەنەرگەتيكا، ەكونوميكا جانە ديپلوماتيا سالالارىندا ءبىلىم الۋدا.

پاۆيلون ءۇش ايماققا بولىنگەن: «ەنەرگيا كەڭىستىگى»، «ءومىر ەنەرگياسى» جانە پوست-شوۋ ايماعى. ءبىرىنشى ايماقتا امەريكالىق جاڭاشىلدىق پەن شىعارماشىلىق رۋحتى بەينەلەپ، الداعى كۇننىڭ ەڭ ۇزدىك يدەيالارى مەن ازىرلەمەلەرىن كورسەتەتىن فيلم ۇسىنىلادى. ەكىنشى ايماقتا «شەكسىز ەنەرگيا كوزى» اتتى پاۆيلون تاقىرىبىنا ساي ازىرلەنگەن كوركەم شوۋ كورسەتىلەدى. ال پوست-شوۋ ايماعىندا قوناقتارعا اقش پەن قازاقستاننىڭ قارقىندى دامىپ جاتقان ىنتىماقتاستىعى تۋرالى باياندالادى.

دجوردج كرول سونداي-اق ەنەرگەتيكا، ينجەنەريا جانە باعدارلامالاۋ سالالارىنداعى جەتەكشى امەريكالىق ماماندار استاناعا قازاقستاندىق ارىپتەستەرىمەن تاجىريبە ءبولىسۋ ءۇشىن كەلەتىنىن حابارلادى.

«شەكسىز ەنەرگيا كوزى – ادامدار، يننوۆاتسيالار، جاسامپازدىق دەپ ەسەپتەيمىز. وسىنىڭ ءبارىن اقش پاۆيلونىنىڭ ەكراندارىنان كورسەتەمىز. ەكسپو – بۇل امەريكالىق كومپانيالار ەنەرگەتيكا سالاسىنداعى ينۆەستورلاردىڭ قىزىعۋشىلىعىن تۋدىرا الاتىن ورىن»، - دەپ تۇيىندەدى ول.

قوناقتارعا مۋزىكا، بي، تەاتر قويىلىمدارى، شەبەرلىك سىنىپتارىنان تۇراتىن مازمۇندى مادەني باعدارلاما ۇسىنىلادى، ال امەريكالىق كوۆبويلار ەكسپو-2017 اياسىندا وتەتىن قازاقتىڭ ۇلتتىق ويىنى كوكپارعا قاتىسادى.

“The Qazaq Times”