تۇركيانىڭ ءىزمىر قالاسىندا تەراكت بولدى

تۇركيانىڭ ءىزمىر قالاسىندا سوت عيماراتىندا بولعان جارىلىستان ەكى ادام قازا تاۋىپ، بەسەۋى جارالانعان. بۇنى رەيتەر اگەنتتىگىنە ءىزمىر گۋبەرناتورى حابارلاعان دەپ جازادى centralasian.org.
ونىڭ اقپاراتى بويىنشا، اۆتوماتپەن جانە گراناتامەن قارۋلانعان شابۋىلداۋشىلار پوليتسيامەن اتىسقان، وسىدان كەيىن مينا ورناتىلعان كولىكتى جارىپ جىبەرگەن. ەكى ادام مەرت بولعان، بەسەۋى زارداپ شەككەن، ولاردىڭ ءبىرازىنىڭ جاعدايى وتە اۋىر.
الدىن الا مالىمەت بويىنشا، پوليتسەيلەر ەكى شابۋىلداۋشىنى ولتىرگەن. بىرەۋى بوستاندىقتا.
جارىلىس جاساعانداردىڭ كىم ەكەنى ءارى ولاردىڭ ماقساتتارى نە بولعانى ازىرگە بەلگىسىز.
ستامبۋلدا 1 قاڭتارعا قاراعان ءتۇنى Reina تۇنگى كلۋبىندا اتىس بولدى. بەلگىسىز ادام عيماراتقا كىرىپ، اۆتوماتتى قارۋمەن جۇزدەگەن ادامعا قارسى وق جاۋدىرعان. 39 ادام قايتىس بولىپ، 65-ءى جارالانعان. بۇل شابۋىلدا "يسلام مەملەكەتى" تەرروريستىك توبى جاۋاپكەرشىلىگىنە الدى.

«The Qazaq Times» ءتىلشىسى الەۋمەتتىك جەلى ارقىلى ءىزمىر تۇرعىنى Seçkin Taştanمەن حابارلاسىپ، وقيعادان كەيىنگى ءمان-جاي تۋرالى سۇراعان ەدى. ىزمىردە قازىر قاتتى جاڭبىر جاۋىپ تۇر دەگەن Seçkin تابيعاتپەن بىرگە ادامداردىڭ كوڭىلدەرى دە جابىرقاڭقى، ءتىپتى قورقىنىشتا ەكەنىن ايتادى. ونىڭ بىلۋىنشە، لاڭكەستەر قولىنان ولگەن ەكى ادامنىڭ بىرەۋى پوليتسيا قىزمەتكەرى ەندى ءبىر جاي جۇمىسشى. "ەگەر، ەكى لاڭكەس دەر كەزىندە ولتىرىلمەسە، ءالى دە كوپ ادامنىڭ ءومىرىن اكەتەر ەدى" دەيدى Taştan. سونىمەن قوسا، ول تۇركيادا قازىر وسىنداي ارەكەتتەردىڭ جيىلەپ كەتكەنىن، جاعداي ءسۇرياداي بولىپ بارا جاتقانىن ايتىپ قىنجىلدى.

«The Qazaq Times»