فوتو:ontustik.gov.kz

وزبەكستان №452 «سامارقان-استانا-نۇرلى جول» حالىقارالىق جۇردەك پويىزىن قازاقستانعا شىعارىپ سالىپ، قاتىناس كولىگىنىڭ العاشقى رەيسى شىمكەنتكە كەلدى، دەپ حابارلايدى وڭتۇستىك قازاقستان وبلىسى اكىمدىگىنىڭ ءباسپاسوز قىزمەتى. 

«بۇعان دەيىن «الماتى-تاشكەنت» باعىتىنداعى تەمىر جول باعىتى اشىلسا، بۇگىن «سامارقان-استانا-نۇرلى جول» حالىقارالىق جۇردەك پويىزىنىڭ العاشقى رەيسىن قارسى الىپ وتىرمىز. ەندى بۇدان بىلاي، وزبەكستاننىڭ ەڭ كونە شاھارلارىنىڭ ءبىرى سامارقاننان استاناعا ارنايى پويىز جۇرەتىن بولادى. ۇزىندىعى 2 مىڭ شاقىرىمعا جۋىقتايتىن تەمىر جول باعىتى اپتاسىنا ءبىر كۇن جۇرەدى. جول باعىتى جۇما كۇنى شىمكەنت ارقىلى استاناعا جول تارتسا، جەكسەنبىدە شىمكەنتتەن تاشكەنت ارقىلى سامارقان باعىتىنا جۇرەتىن بولادى»، - دەدى وقو جولاۋشىلار كولىگى جانە اۆتوموبيل جولدارى باسقارماسىنىڭ باسشىسى نۇرلان بايعۇت.

قوس ەلگە ورتاق تەمىرجول باعىتىن شىعارۋ تۋرالى شەشىم وسى جىلدىڭ ناۋرىز-ءساۋىر ايلارىندا ەكى ەل پرەزيدەنتتەرىنىڭ استاناداعى، سارىاعاشتاعى باسقوسۋلارى جانە ق.مامين باستاعان ۇكىمەتتىك جۇمىس توبىنىڭ تاشكەنتكە بارۋىنىڭ ناتيجەسىندە مۇمكىن بولعان.

ايتا كەتۋ كەرەك، سامارقان-استانا باعىتىنا جول ءجۇرۋ قۇنى 28 مىڭ تەڭگەگە جۋىقتايدى.

“The Qazaq Times”