فوتو: The Daily Beast

شەتەلدىك اقپارات كوزدەرىنىڭ كەشەگى باستى تاقىرىبى، كوپتەگەن ەلدەردىڭ باسشىلارى باس قوسقان G7 سامميتىندە سويلەنگەن سوزدەر مەن ءىس-قيمىلدارى بولدى. دەسە دە، جۇرتتىڭ نازارىن كوبىرەك اۋدارعانى – تاعى دا سول اتىشۋلى اقش پرەزيدەنتى دونالد ترامپ بولدى. كوپتەگەن شەتەلدىك باسىلىمدار ترامپتىڭ سامميتتە وزگە ەل باسشىلارىنىڭ سوزىنە مۇلدە نازار اۋدارماعانىن ايتىپ سىناۋدا. بۇل عالامدىق اقپارات قۇرالدارىندا قىزۋ تاقىرىپقا اينالىپ شىعا بەردى. ءتىپتى اقۇي ءباسپاسوز حاتشىسىنان ارناۋلى تۇسىنىكتەمە سۇرادى.

(1-ءشى سۋرەت) گەرمانيا كانتسلەرى، تۋنيس پرەزيدەنتى جانە وزگە ەل باسشىلارى G7 سامميتىندە. فوتو: News.Sina

بريتاندىق «Mirror» (اينا) باسىلىمى سامميتتەگى بەينە ءتۇسىرىلىمدى جىڭىشكەلىكپەن تالداپ كورسەتتى. باسىلىمدا: «بەينە كورىنىس كەسىندىلەرىنىڭ مىنا ءبىر (2-ءشى سۋرەت) بولەگىنە نازار اۋدارىڭىز. بۇل يتاليا پرەمەر-ءمينيسترى ارناۋلى بايانداما جاساپ جاتقان كەز. گەرمانيا كانتسلەرى انگەلا مەركەل مەن تۋنيس پرەزيدەنتى كايد ەس-سەبسي جانە وزگە ەلدەردىڭ باسشىلارى بار نازارىن سالىپ تىڭداپ وتىرعانى بايقالادى. الايدا، پرەزيدەنت ترامپتىڭ ارەكەتى تۇسىنىكسىز. قۇلاعىنا اۋدارماشىنىڭ تىڭداعىشىن دا ىلمەگەن كۇيى، ءتۇس كورىپ كەتكەن سەكىلدى. الدە، ترامپ يتاليا ءتىلىن جاقسى بىلە مە؟»، – دەپ جازىلىپتى.

(2-سۋرەت) ترامپتىڭ سامميتتە ءتۇس كورۋى. فوتو: News.Sina

اقش پرەزيدەنتىنىڭ العاشقى ساپارىندا ول تۋرالى الىپ قاشپا پىكىرلەردى ات كوتەرىپ جۇرە الماستاي بولدى. جۇرت ونىڭ اراب باسشىلارىمەن كوڭىلسىز «قىلىش ءبيىن» بيلەۋى. يزرايلدە حانىمىمەن تۇسىنىسپەي قالۋى سەكىلدى كەيبىر اعاتتىقتارىن تەرۋدە. ءتىپتى ونىڭ ريم پاپاسىمەن جولىققانى تۋرالى نە ءبىر داقپىرتقا ۇقساس ۆيدەولار دا تاراپ كەتتى. ترامپ تۋرالى الەمدى كەزگەن بۇل پىكىرلەر ونىڭ الداعى ساياساتتاعى بەدەلىنە كەرى اسەر ەتەتىنى انىق. بىراق بۇل قىلىقتارى ونى بىردەن-اق الەمدەگى ەڭ تانىمال تۇلعاعا اينالدىردى.

“The Qazaq Times”