فوتو: Minval.az

 Standard & Poor's (S&P) حالىقارالىق رەيتينگ اگەنتتىگى ازەربايجاننىڭ شەتەلدىك جانە ۇلتتىق ۆاليۋتاداعى ۇزاق مەرزىمدى نەمەسە قىسقا مەرزىمدى كرەديتىك رەيتينگىن باعالاپ، "BB+/B", دەڭگەيىندە قالدىردى. مۇنداي مالىمەتتى ەلدىڭ قارجى مينيسترلىگى تاراتتى. 

"اگەنتتىك ازەربايجاننىڭ كرەديتتىك رەيتينگىن كەزەكتەن تىس باعالاۋ كەزىندە  "BB+/B" دەڭگەيىندە قالدىردى. مۇنداي باعالاۋدىڭ باستى سەبەبى ازەربايجان حالىقارالىق بانكىنىڭ سىرتقى قارىزدارىن قايتا قۇرىلىمداۋ ماسەلەسى بولدى", - دەيدى قارجى مينيسترلىگى.

S&P ماماندارىنىڭ سوزىنشە، ءجىو-گە شاققانداعى ازەربايجاننىڭ سىرتقى قارىزىنىڭ ءوسىمى 2017 جىلدىڭ قاڭتارىندا ەلدەر رەيتينگىن باعالاۋ كەزىندە ەسەپكە الىنعان. سوندىقتان ءاحب-عا قاتىستى جاعداي ازىرگە ازەربايجاننىڭ رەيتينگىنە اسەر ەتە قويمايدى.

بۇعان دەيىن ءاحب 3,3 ملرد دوللار قارىزدى قايتا قۇرىلىمداۋ ءۇشىن نيۋ-يورك سوتىنا وزدەرىن بانكروت دەپ تانۋ تۋرالى ءوتىنىش جىبەرگەن. سوت بۇل ءىستى 7 ماۋسىمعا شەگەردى.

ەسكە سالايىق، ازەربايجاننىڭ بۇل بانكىنە قازاقستاندىقتاردىڭ 71,3 ملرد تەڭگەگە جۋىق زەينەتاقى جيناعى سالىنعانى تۋرالى حابارلانعان. وسىدان سوڭ ازەربايجان بيلىگى پروبلەمالى بانككە سالىنعان قازاقستاندىق زەينەتاقى قارجىسى قايتارىلاتىنىن مالىمدەگەن. دەگەنمەن ءاحب قارىزدى قايتارۋدىڭ ءتيىمسىز ءۇش نۇسقاسىن ۇسىنىپ وتىر.

"The Qazaq Times"