الماتىدا ومارعازى ايتاننىڭ «قۇستار قايعىسى» اتتى جيناعىنىڭ تۇساۋى كەسىلدى

26 مامىر كۇنى، الماتى قالاسىنداعى ۇلتتىق كىتاپحانا «كورمەلەر زالىندا» «ەر جانىبەك» اتىنداعى حالىقارالىق قوعامدىق قوردىڭ جانە قر ۇلتتىق كىتاپحاناسىنىڭ ۇيىمداستىرۋىمەن ومارعازى ايتاننىڭ «قۇستار قايعىسى» اتتى جىر جيناعىنىڭ تۇساۋكەسەرى ءوتتى.

اقىن اقىنعا ارناۋ جىرىن وقۋدا.

قازاق ادەبيەتىنىڭ كلاسسيگى اقىن، جازۋشى، دراماتۋرگ ومارعازى ايتانۇلىنىڭ دۇنيەگە كەلگەنىنە 85 جىل تولۋىنا وراي، «ەر جانىبەك» حالىقارالىق قوعامدىق قورى جانىنان «قۇستار قايعىسى» اتتى جىر جيناعى جارىق كورگەن بولاتىن. جيناقتىڭ باسپادان شىعۋىنا «Kelun-Kazpharm» جشس دا قولداۋ كورسەتكەنىن ايتا كەتەيىك.

تۇساۋكەسەردى اقىن مۇرات شايمارانۇلى جۇرگىزدى

26 مامىر كۇنى ۇلتتىق كىتاپحانامەن بىرلەسىپ اتالعان جيناقتىڭ تۇساۋكەسەرى ءوتىپ، اقىننىڭ شىعارمالارى وقىرماندارىمەن قاۋىشتى. قازاق پوەزياسىنىڭ اسقار بيىگىنىڭ ءبىرى جاركەن بودەشۇلى، تاريح عىلىمدارىنىڭ دوكتورى، پروفەسسور ءنابيجان مۇحاممەدحانۇلى، «ەر جانىبەك» حقق-نىڭ پرەزيدەنتى جەڭىس تۇركيا جانە اقىن مۇرات شايماران كىتاپتىڭ تۇساۋىن كەستى.

ەرمۇرات باپي (ورتادا) اقىننىڭ شىعارمالارىمەن جۇزدەسكەنىنە قۋانىش ءبىلدىردى.

شارادا اقىننىڭ كوزىن كورگەن زامانداستارى مەن ىزىنە ىلەسكەن ىنىلەرى ومارعازى ايتاننىڭ شىعارماشىلىعى مەن ءومىرى جايىندا سىرلارىن جينالعان قاۋىمعا ءبولىستى. جاركەن بودەشۇلى، ن.مۇحاممەتحانۇلى، بولات باپاي، الماس احمەتبەكۇلى، ەرمۇرات باپي، باباقۇمار حينايات، باقىتبەك ءبامىش جانە باسقا دا ادەبيەت پەن عىلىمنىڭ وكىلدەرى ءسوز الدى.  قازاق پوەزياسىندا ەشكىمگە ۇقسامايتىن دارا جولىن سالىپ كەتكەن اقىننىڭ بۇرالاڭ تاعدىرى، كەشكەن كەشۋلەرى مەن اسقان اسۋلارى، بيىك پاراساتى مەن اسىل ادامگەرشىلىگى، شىعارماشىلىعىنداعى ءبىتىم بولمىسى بولەك ورنەك ايشىقتار تۋرالى اڭگىمەلەر ايتىلدى.

باباقۇمار حينايات "ەر جانىبەك" حقق-نىڭ جانىنان شىعارىلعان كىتاپتاردى اتاپ، العىس ءبىلدىردى.

بولات بوپاي اقىن ءومىرى تۋرالى تاماشا ەستەلىكتەر ايتتى.

تۇساۋكەسەرگە اقىننىڭ تۋىستارى جانە الماتىداعى جىر سۇيەر قاۋىم قاتىستى. شارا سوڭىندا ايتان اۋلەتى جينالعان قاۋىمعا داستارحان جايىپ، مارقۇمنىڭ ارۋاعىنا باعىشتاپ قۇران وقىلدى.

"ەر جانىبەك" حقق پرەزيدەنتى جەڭىس تۇركيا.

ومارعازى جىرلارىن وقىرمانىنا قاۋىشۋىنا سەبەپشى بولعان "ەر جانىبەك" حقق-دىڭ پرەزيدەنتى جەڭىس تۇركياعا، اقىننىڭ تۋىستارى العىس ءبىلدىرىپ، يىعىنا شاپان جاپتى.

(وڭنان سولعا قاراي) قويشىبەك مۇباراك، مۇرات شايماران مەن تالاپبەك تىنىسبەك.

كىتاپتىڭ باسپادان شىعۋىنا ەڭبەگى سىڭگەن اقىن مۇرات شايماران مەن جازۋشى قويشىبەك مۇباراكقا ايتان اتانىڭ اۋلەتى كىتاپتىڭ ءسۇيىنشىسىن بەردى.

اتالعان جيىن ومارعازى ايتانۇلىنىڭ ومىردەن وزعان كۇنىنە تۋرا كەلدى.

“The Qazaq Times”